French Open Alcaraz tan harsatna la awm lo

French Open khelh laiah Carlos Alcaraz chu hmalam panin a kal zel. World number 1 hian Pathianni zan khan Lorenzo Musetti chu 6-3, 6-2, 6-2 a hnehin quarterfinal a inhlangkai.

Spanish tlangval hian hnehna chang turin vawi 42 ngawt winners a vaw chhuak a, a khingpui service vawi sarih a chhuhsak bawk. Grand Slam bikah match a khelh hnuhnung 11 zetah hnehna a chang fai vek.

Seeded pakhatna Alcaraz chuan, "A tir aṭangin ka khel fuh, tun anga khelh zel hi ka tum ang," a ti. Tun season chhungin tournament hrang hrangah match 34 a chak tling tawh a, ṭum thum chu a vanduai zawkah a ṭang.

Alcaraz hian zaninah Stefanos Tsitsipas a hmachhawn leh dawn. Seeded pangana Tsitsipas hian inkhel dangah Sebastian Ofner chu 7-5, 6-3, 6-0 in a lo hneh ve thung, quarterfinal inkhel hi a hmuhnawm ngei ngei dawn.

Greek tlangval Tsitsipas chuan, "Thleng sang tur chuan player ṭha paltlang a ngai, chutiang dinhmunah chuan ka ding a ni mai. Tennis ngainatute tan inkhel hmuhnawm kan chhawpchhuah ngei ka beisei a, an en châk pawh ka ring.

"Carlos hi chuan eng inkhelah pawh a khel ṭha ziah, thawk lakna hun pawh min siamsak ngai meuh lo. Ani hmachhawn hi tunlaiah chuan player dang tan chona hautak leh phurawm tak a ni vek," tiin a sawi.

Player pahnih an intawn hnuhnung ber chu Barcelona Open kha niin, inkhel inhnehtawk takah Alcaraz hi a chak a, an intawn tawhna zawng zawngah 4-0 in hma a hruai fal - Tsitsipas tan French Open semifinal lut tur chuan tun hma lama a tih theih ngai loh a tih a ngai dawn.

Inkhel dangah Novak Djokovic pawh a chak. Serbian star hian Juan Pablo Varillas chu 6-3, 6-2, 6-2 in a hneh a, clay court inelna lian Roland Garros-ah hian a ṭum 17 nan quarterfinal a inhlangkai a ni.

Serbian star Djokovic hian seeded 13-na Karen Khachanov a hmachhawn leh dawn, a chak a nih chuan Tsitsipas leh Alcaraz te inkhela chak zawk chu semifinal-a a bitum tur an ni, a hmabak a hautak chho dawn hle.

Kum 36 mi Djokovic hi a champion thei a nih chuan Rafael Nadal (22 titles) khumin Grand Slam champion hnem ber a ni thei dawn. Kum 2016 leh 2021-a a champion tawhna hmunah hian season dang zawng aiin hlawhtlin a châk zual ngei ang.