Footballer ropui Zlatan Ibrahimovic a chawl ta

“Uain ṭha mi ang mai ka ni - ka upa tawlh tawlh a, ka ṭha tawlh tawlh a ni," titu Zlatan Ibrahimovic tan meuh pawh inkhelh reng theih a ni lo - Swedish footballer ropui hian kum 41 mi ni chungin inkhelh a chawlhsan thu a puang ta.

Pathianni zan khan AC Milan-in tun season Serie A-a an match hnuhnung berah Verona chu 2-1 in an hneh a, inkhelh zawhah Ibra hian football a mangṭha thu a puang - a chawlh tur thu a puan hma hian Milan a chhuahsan tur thu a lo puang tawh.

Ibra chuan, "Mangṭha tiin football ka thlah ta a, nangni erawh ka thlah ve lo che u," tiin San Siro khat tlata fans kalkhawmte hmaah thu a sawi a, amah thlah nana Milan fan-ten 'Godbye' tih an tarlante chu amah Ibra nen a inhmeh bik ngawih ngawihin a hriat.

Swedish striker ropui chuan, "Ka thinlungah hian thil tam tak a awm. Milan kal zel ula, mangṭha ule," a ti a, fans tam takin an mittui an dang zo lo - amah Ibra meuh pawh a mittui a tlak kha!

Milan legend

An ram club Malmo FF aṭanga a professional career ṭantu Ibra hian kum 2010 khan AC Milan hi a vawi khat nan a zawm a, season hnih a khelh hnuah Paris Saint-Germain panin a chhuahsan.

Kum 2019 khan Milan-ah bawk hian kir lehin a professional career hman tawp nan a hmang ta - Italian club tan hian Serie A nomawi vawi hnih a chawi a, kum 2011 khan Supercoppa Italiana a chawipui bawk.

Ibra chuan, "He hmun ka rawn pan hmasak ber khan hlimna tam tak min pe a, ka vawi hnih rawn kalnaah hmangaihna min pe. Inhawng tak chungin min lo lawm a, mahni ina awm ang mai ka ni ṭhin.

"Ka dam chhung zawng hian Milanista ka ni tawh dawn a nih hi," a ti a, AC Milan fan ruhkawl a nih reng tur thu a sawi - San Siro stadium khat tlata kal khawm mipuite chuan a hming lam rual chungin Ibra an thlah a, hawina lam apiangah an mittu a tla em ni chu aw, tih mai tur a ni.

Mittui chu!

Player ropui bik a nihna piahlamah a ṭawngkam thiam avangin Ibra hian ngainat leh hriat a hlawh a, chanchin maksak tak tak sawi tur a ngah hle. A chawlh thu a puan zanah pawh Ibra chuan, "Zing ka tho chu ruah a lo sur a, ka chawl tur chu pathian meuh pawh a ṭap a nih hi a, ka ti hial a ni," a ti!

Ibra hian football a khelh chhungin champion nomawi 34 ngawt a chawi a, heng zingah hian league title 14 a tel. Mahse, Champions League nomawi erawh a chawi ta lo a, kum 2017-a Manchester United tana Europa League nomawi a chawi chu European football-a a champion awmchhun a ni.

Sweden tan match 122-a goal 62 khung chunga ram tana goal khung hnem ber record chelhtu chuan, "Journalist-ten ka hma hun chungchang min zawh chang hian hlauhthawnnain ka khat ṭhin. Mahse, tunah chuan ka chawlh a hun ve ta tih hi ka pawm a, ka inpeih ta e.

"Ka nun pumpui hi football chu a ni a, football hian mi puitlingah min chher chhuak a ni. Football vangin ka hriat ngai loh tur mi tam tak ka tawng a, khawvel hmun hrang hrang ka fang kual bawk. Heng zawng zawng hi football vanga ka tawn a ni," a ti a, a chawlhsan tak infiamna chu a ngaihlu hle.

Career duhawm

Ibra hian kum 1999 khan Malmo aṭanga a professional career ṭanin, kum 2001 khan Ajax a zawm a - kum thum a cham chhungin league nomawi pathum a chawi a, kum 2004-ah Juventus zawmin league nomawi pahnih chawipui mah se Italian football buaina avangin an nomawi hi laksak an ni thung.

Mahse, Ibra hian Inter Milan pan zuiin, season thum a khel a, inelna hrang hrangah match 117 khela goal 66 khungin Serie A nomawi pahnih a chawi a, kum 2009 khan a hunlaia club ṭha ber ang hiala chhal Barcelona a pan.

Mahse, Catalan club-ah rei a daih lo - season khat chauh khelin, match 45-ah goal 21 a khung a, La Liga nomawi a chawi. Season khat hnuah loan-in a chhuak a, AC Milan a zawm.

A in ang maia a ngaih zui tak Milan-ah hian season khat hnuah a ngheta cham turin contract a ziak a, season hnih chhunga match 85 khela goal 56 khungin Serie A-ah a champion pui bawk.

A tawp ta

Ibra hian Milan aṭanga Paris Saint-Germain pan zuiin, French club-ah season li a khel a, match 180-ah goal 156 a khung a, league nomawi vawi li a chawi - PSG a chhuahsan hnuah Manchester United a zawm a, match 53-a goal 29 khungin League Cup leh Europa League-ah a champion pui.

Kum 2018 khan LA Galaxy zawmin, match 58-ah goal 53 a khungsak a, Malmo tih loha nomawi a chawi lohna awmchhun a ni - inkhelh chawlhsan mai tawh tura ngaih a nih laiin December 2019 khan Milan-ah a kir a, match 78 khela goal 37 khungin, season hmasa khan Serie A nomawi a chawipui.

Thawnthu ngaihnawm tak pawhin tawp hun a neih a ṭul ṭhin a, ennawm hmuhnawm ber pawh puan zar khar hun a thleng ṭhin - footballer hmuhnawm bik Ibra tan pawh boot khai a ṭul a, professional footballer a nihna anga a thawnthu chu tihtawp a ni ta.

Ballon d'Or dawng thei tura vawi 11 zet chhawpchhuah ni thei Ibra chuan, "Ka thinlung hi a tawt em em a, harsa ka ti takzet - mahse, hei hi ka sawi duh, kan inhmu leh dawn nia, in vanneih hlauh chuan," a ti leh hram a, a hmangaih em em football a mangṭha ta.