Salem Veng lakah Hualngohmun zinkawng a tawp

LBS Suzuki 21st Inter Branch YMA Football Tournament-ah Venghnuaiin RG Stadium-ah Bethlehem Vengthlang hnehin semifinal an lut a, an zawh chiahah an veng ṭhenawm Salem Veng an rawn inlan lehnghal. Salem Veng hian Venghnuai hnung zuiin Aizawl khaw pawn aṭanga team ṭha Hualngohmun hi penalty shootout hmangin an hneh a, CYMA Football 2023-ah Aizawl khaw chhung branch an champion dawn.

Nimin quarterfinal hmuhnawm takah Salem Vengin Lalremruata hmangin hma hruai mah se Vanlalthanga hmangin Hualngohmunin siphurh an sut. Quarterfinal-ah extra time a la awm lo a, penalty shootout hmangin chak zawk zawn a ṭul - Salem Veng hi keeper RVL Lalnunmawia'n a chhan a, captain Joseph Lalnunpuia'n chakna goal a khung.

Team pahnih an intluk tawk a, Hualngohmunin Salem Veng lakah team ṭha an nihzia a pholang. Chutihrualin coach ṭha Lalrindika Hmar hnuaia khel Salem Vengin team game mawi hmangin Hualngohmun tlarhnung an ṭhiat a, minute 19-na lekah Lalremruata'n mual dinglam aṭanga tlan lutin goal hmahruai a khung.

Goal khata hnufual hnuah Hualngohmun an huai sawt a, ball sangah Salem Veng keeper Nunmawia a talbuai a, goal erawh a chhuah bik lo. Second half-ah pawh Hualngohmun goal bawh a na chhunzawm a, a tawpah an thawhrim rah an seng. Captain Lalramtharmawia'n Salem Veng player ball chhuhsakin Lalnunhlua tan a pe nghal a, Hualngohmun no. 10 hian through ball pe lutin Vanlalthanga'n awm loa ta awmah a siam. Minute 55-naah Thanga'n box pawn aṭangin goal kil taka kal turin a pet nghal a, Salem Veng keeper Nunmawia'n dan ngaihna a hre lo.

Hualngohmunin siphurh an sut tak avangin Salem Veng goal venhim ringawt tum loin an nawr leh ta zawk a, inkhel pawh an inhnehtawk leh ta hle. Salem Veng siphurh suttu Remruata'n minute 83-naah chance ṭha bik a nei a, goal-ah ṭha zetin pet mah se Hualngohmun keeper PC Lalruathlua'n a dang ṭha hle.

Hun pangngaiah team pahnih an inhnehtawk. Penalty shootout hmangin chak zawk zawn a ni a, player 10 pet zing aṭangin Zomuansanga chauhin a khung lo. Hualngohmun no. 9 Zomuansanga hian goal kilah pet mah se Salem Veng keeper Nunmawia'n a ring dik a, a save ṭha takzet. A tawpah cpatain Joseph Lalnunpuia'n Salem Veng chakna goal cool takin a rawn khung a, Salem Veng mipui an lam - an hmaa ding leh tur chu an ṭhenawm Venghnuai an ni.

Salem Veng coach Lalrindika Hmar chuan, "Hualngohmun hi team ṭha an ni a, Inter Village Football-ah pawh khan kan hneh ṭawk. Tun ṭumah pawh kan vannei zawk a, hnehna kan chan hi kan lawm hle. Mahni veng Venghnuai hmachhawn loh chu duhthusam a ni a, chutihrualin kan hmachhawn dawn takah chuan hneh ngei kan tum ang," tiin Vanglaini a hrilh.