Roma ngam loh Sevilla

Europa League vawi nga champion tawh Sevilla chuan nomawi chawi leh ngei an tum tih an lantir. Spanish club hian an mikhual AS Roma chu 2-0 a hnehin quarterfinal an lut, semifinal lut turin Wolves paltlang leh a ngai dawn.

Ningani zan inkhelah Sevilla tan hian Real Madrid aṭanga loan hmanga an hawh lai Sergio Reguilon leh Youssef En-Nesyri ten goal khat ve ve an khung. Hun tawp dawnah Roma defender Gianluca Mancini chu Luuk de Jong a nghawk avangin hnawhchhuah a ni.

Coronavirus vangin Europa League hi hun rei tak chhung a khaihlak. Last 16 first leg khel hmante chu second leg anmahni mualah an khel chhunzawm a, first leg khel hman lote chu Duisburg, Germany-ah an intawng a, vawi khat inkhelha chak zawk an tlang.

Sevilla leh Roma te pawh hripui leng vangin match hmasa an khel hman lo, tun ṭuma vawi khat inkhelha chak zawk hi an tlang nghal a ni. Quarterfinal chin aṭang chuan German ramah match zawng zawng khelh chhunzawm a ni tawh dawn.

Spanish manager Julen Lopetegui chuan, "Team ṭha leh player ṭha tak tak awmna kan hmachhawn a, ka hmuh dan chuan team pahnih kan khel ṭha hle. Minute 90 kan khel kha kan thlir kir a nih chuan chak phu zawk kan niah ka ngai, tunah chuan match khelh hmabak atan rilru kan pe thei tawh ang," a ti.

Inkhel dangah Steven Gerrard-a enkawl Rangers chu Bayer Leverkusen mualah 1-0 in an tlawm a, inkhel pahnih belhkawmah Bundesliga club hi 4-1 in an tlang. Rangers hian thla 13 chhung an khelh tawh Europa League chu an mangṭha a ngai ta.

Rangers manager Gerrard chuan, "Kan result avangin a lawmawm loh, kan ṭhat dan berin kan khel chhuak lo a ni. Hmasawn ngaihna lai kan zir chhuak nual a, tun ṭumah chuan team ṭha leh chak phu zawk an chak," tiin an chak loh a pawm.