Khawzawl Vengthar tan Bawngkawn an ṭha hret

LBS Suzuki 21st Inter Branch YMA Football Tournament-ah Bawngkawnin team ṭha an nihzia an nemnghet leh a, nimin khan Khawzawl Vengthar lakah goal chhuah hmasa mah se talbuai loin 3-1 in hnehna an chang.

Bawngkawnin hrem vangin Vanlalremruata an chhawr thei lo a, midfielder ṭha Zonunmawia chu Inrinni khan Upa C. Keikhuma Memorial Football Tournament khela Champhaia a chhoh avangin hahdam nan bench-ah an dah bawk.

K. Malsawmkima'n player chhawr tur a la nei tho a, ISL player H.P. Lalremruata leh Santosh Trophy-a Karnataka champion puitu Lalremtluanga Fanai tan bul ṭanna hun remchang a ni thung.

Lammual inkhelah mak takin Khawzawl Vengtharin goal an khung hmasa a, Bawngkawn keeper ball pet chhuah Khawzawl defender tauh luh chu Bawngkawn tlarhnungin an en liam. Khawzawl forward V. Lalhriatrenga'n Bawngkawn tlarhnung tihsual chu remchangah lain mawi zetin keeper a pet khum a, goal class a ni.

Bawngkawn an talbuai phah lo a, Lalromawia leh Tluangtea te hmangin inkhel an thunun. Minute 41-naah dinglam aṭanga Augustine Lalrochana cross ṭha chu H.P. Lalremruata'n a tauh goal. Khawzawl lamin MPL best forward MC Malsawmzuala an veng uluk a, amaherawhchu player dang an ṭhat tho si avangin ven sen an ni ta lo. Khawzawl an fimkhur lo a, an inthlahdan vangin hun tawp hma hretin Bawngkawnin corner an hmu. Dinglam aṭanga Augustine-a corner pet chu Tluangtea'n mawi zetin a tauh goal a, minute 45-naah 2-1 a ni.

Second half-ah Bawngkawn bawk che ṭha mah se Khawzawlin siphurh sut tumin an nawr a, Bawngkawn lamin player tlan chak an ngah avangin an inveng seng lo. Minute 59-naah Augustine-a'n dinglam aṭangin ṭha zetin a khalh lut a,a ball fing tak chu Isak Vanlalruatfela'n keeper bum nan hmangin chak nemnghehna goal a khung.