Nuggets lakah Heat an chak

Nimin zing NBA Finals game 2 inkhelah Miami Heat chuan Denver Nuggets chu an buzawlah 111-108 in an va luhchhuah a, match hmasa zawkah chak lo mah se tunah chuan 1-1 in an inhnehtawk leh ta.

Heat hi a tirah an che fuh lo, first half-ah phei chuan point 15 ngawtin an hnufual. Mahse, quarter hnuhnung berah 36-25 in an lehthal a, hun tawp hma second 48.3 chauh awm tawh free throw vawi hnih a neih te chu an chakna hnar a ni.

Regular season hmang ṭha tawk lo Heat hi seeded pariatna an ni a, seeded hniam ber ni chunga NBA champion thei an la awm ngai lo - tunah hian midangin an la tih theih ngai loh mellung pawimawh phun an beisei mek.

Hnehna an chan theih nan Gabe Vincent chuan point 23 neiin a khel ṭha a, ani bakah hian Bam Adebayo leh Jimmy Butler te chuan point 21 ve ve an nei. Hun tawp dawnah Adebayo hian an chakna basket a khung.