Pep-a'n Gundogan chelh a duh

Manchester City tan Ilkay Gundogan-a'n FA Cup final-ah goal hnih a khung a, hemi zawh ruala zawhna awm nghal chu, tun season bak Etihad Stadium-ah a cham zel ang em, tih chu a ni.

Gundogan hian tun season tawp rualin City-a a contract hi a hmang zo tawh dawn - kum 32 mi ni tawh mah se a theihna a la san em avangin duhtu tam tak an la awm ang tih a chiang.

City boss Pep Guardiola chuan, "Gundogan hian ka rilru chu a hria. Kan club football director Txiki Begiristain chuan a cham zel theihna turin hma a la mek a, a hlawhtlin ka beisei," a ti a, German midfielder chelh a duh.

Gundogan hi Pep-a'n kum 2016-a City a enkawl ṭantirha a player lakluh hmasak zinga mi a ni a, an pahnih hian City-ah nomawi 11 an chawi dun tawh - season hmasa tawp ruala Fernandinho-a'n City a chhuahsan khan City player-te chuan an captain atan Gundogan hi an 'vote' a, Etihad Stadium-ah hmun pawimawh a chang.

Germany international hi Pep nen Manchester khawpuiah inhnaihtêin an cheng bawk a, an inkawmngeih hle. Guardiola chuan, "Ṭhenawm kan ni a, floor khatah kan awm ho rei tawh avangin ka ṭhian hnai tak a ni.

"FA Cup final a khel ṭha takzet a, Aston Villa laka a goal khung pawimawh êm êm te kha ka theihnghilh lo - ṭha takin season kan khar theih ka beisei," a ti.

Season hmasa khan Manches-ter City hi Premier League tawp niah Liverpool nen champion thei dinhmunah an ding ve ve - Aston Villa lakah hnehna chan ngei ngei an mamawh a, minute 75 thleng chuan 2-0 in an hnufual.

Mahse, City tan Gundogan chuan goal hnih khungin, Rodri chuan goal khat a khung bawk a, a tawpah 3-2 a hnehna changin Premier League nomawi an chawi a ni.