Benzema - Real tana a match hnuhnung ber a khel ta

Karim Benzema-a'n season tawp rualin Real Madrid a chhuahsan tawh dawn a, kum khat contract la nei mah se Saudi Arabia aṭanga hnar rual loh sawmna a hmuh avangin Saudi lam a pan dawn niin an sawi.

Benzema hian Real tana a match hnuhnung berah penalty aṭangin goal a khung a, Athletic Bilbao nen 1-1 in an inhnehtawk - Oihan Sancet chuan Bilbao tan goal hmahruai a khung a, hetihlai hian Real keeper Thibaut Courtois chuan Mikel Vesga penalty pet a dansak thung.

Real tana season 14 zet khel hman Benzema hi Luka Modric chuan minute 74-naah thlakin, Santiago Bernabeu-a fan-ten ding chungin an zahna an lantir a, hun pek belha lakchhuah Marco Asensio pawh zah takin an thlah - Asensio pawh hian Real a chhuahsan dawn.

Hetihlai hian chhuak ve tur tho Eden Hazard erawh khelmualah inlanna hun pek a ni lo a, heti chung hian inkhelh zawhah a ṭhianten a phu ang takin an thlah a, Real hian pahnihna ni chungin season an khar - Pathianni zan khan league match khelh zawh vek a ni.

Joaquín a chawl ta

Real Betis chuan La Liga aṭanga tla thei dinhmuna ding Valencia chu 1-1 in an inhnehtawkpui a, minute khatna lekah Ayoze Pérez chuan goal hmahruai khung mah se Diego Lopez hmangin Valencia hian an chhanglet a ni - he inkhel hi Betis legend Joaquin tan a match hnuhnung ber a ni.

Joaquín hian Betis tan match 528 khelin goal 66 a khungsak a, La Liga match 622 khelin Barcelona keeper hlui Andoni Zubizarreta-a'n La Liga match khel hnem ber record a siam chua nih rual.

Kum 41 mi Joaquin hian Betis hi Copa del Rey-ah vawi hnih a champion pui - Valencia, Malaga leh Fiorentina tan a khel tawh bawk a, Betis tana a match tawp bera Valencia ber kher an hmachhawnte hi thil danglam tak chu a ni ve hrim hrim.

Valencia hi Pathianni zan La Liga inkhelh hmain tla thei dinhmunah an ding - anni bakah Real Valladolid, Almeria, Cadiz, Celta Vigo leh Getafe chu tla thei dinhmuna ding vek an ni. A tawpah Getafe nena inhnehtawk Real Valladolid an tla. Spanish La Liga aṭang hian Valladolid bakah hian Espanyol leh Elche te chu an tla bawk.

Barca an tlawm

La Liga tawp nia hmabak hautak bera ngaih chu Celta Vigo an ni a, champion lai Barcelona an mikhual - mahse, chak loh chuan division hniam lama tla thei team hian hnehna an chang a, Catalan club hi 2-1 in an lo hneh.

Celta-in Barcelona an mikhual hma hian relegation zone aṭanga an himna chu point khat chauh a ni a, thil thleng thei tam tak ngaihtuahin chak an mamawh - Celta tan a hunah tak Gabri Veiga a inlar a, goal hnih a khung. Minute 42-naah goal hmahruai a khung a, chawlhlawk hman hunah pawh goal khung hmasatu ni lehin, minute 65-naah a belhchhah.

Celta-in an goal hnihna an khungin minute 25 hun a la awm a, fan-te hlauthawng pawh a reh hman. Catalan club tan Ansu Fati chuan minute 79-naah khung ve lehin, Celta fans a tihlauthawng nawn a, mahse, hun tawp thlengin goal dang a lut tawh lo.

A zawna season 12-na turin Celta-in La Liga an khelh chhunzawm dawn a, Barcelona erawhin tlawm chungin season an khar - an champion chian hnua league match li an khelhah vawi thum ngawt an tlawm a ni.