Fiahna paltlang Sabalenka

French Open hmeichhe singles champion tura rinkai Aryna Sabalenka chuan fiahna a paltlang. Pathianni zan khan seeded pahnihna hian Sloane Stephens chu 7-6 (7-5), 6-4 in a hneh a, quarterfinal a inhlangkai.

US Open 2017 champion Stephens hi a tir lamah a khel ṭha lo hle a, game nga la zawnin a khingpui hi beiseina a siamsak lo tluk a ni. Mahse, tie break khelh ngai khawpin a pawtthla thei a, a tawpah a vannei zawkah a ṭang hram.

Inkhel dangah Elina Svitolina chuan Daria Kasatkina 6-4, 7-6 (7-5) a hnehin a thiam zual pariat zingah a inhlangkai bawk a, semifinal lut tur chuan Australian Open 2023 champion Sabalenka a pal-tlang leh a ngai dawn a ni.

Pathianni zan hian 2021 French Open pahnihna Anastasia Pavlyuchenkova pawhin seeded 28-na Elise Mertens chu 3-6, 7-6 (7-3), 6-3 in a hneh, khup hliam vanga thla nga zet a chawlh hnuah a dam chiang ta - Karolina Muchova nen an intum leh ang.