A zawna vawi thum chak Verstappen

Formula 1 champion lai Max Verstappen chuan tun hnaiah a zawnin vawi thum hnehna a chang ta a, driver championship hmahruaitu a nihna a sawhnghet zel. Point 53 ngawtin hma a hruai fal ta a ni.

Pathianni zana tlan zawh tak Spanish Grand Prix-ah Red Bull driver Verstappen hi a chak ber a, a hnungah hian Mercedes car khalhtu Lewis Hamilton a thleng thung - season kal laiah Hamilton hian a tlan ṭhat ber ṭum a tawng.

Dutch tlangval Verstappen hian car intlansiakna sang berah vawi 40 hnehna a chang tling ta chiah, a vawi thum nan a champion leh dawn ni pawhin a lang. A teammate Sergio Perez chu palinaah a thleng thung a ni.

Championship hmahruaitu Verstappen chuan, "Car ṭha lutuk mai khalh tur kan nei hi ka lawm. Kawng kawi hmasa berah khan chetsual nghal theih a ni tih ka hria a, ka chetsual tak lohah chuan a hnu lam chu a awlsam phah," a ti.

Mercedes lamin hnehna chang chiah lo mah se an thlen chinah hma an sawn a, pahnihna Hamilton hnungah a teammate George Russell a thlen avangin an tan chanchin ṭha a ni. June 18, Pathiannia Canadian GP an tlan leh tur atan beisei an nei sang ang.