Napoli kutah Serie A nomawi

Serie A champion an ni tih a chianna a rei tawh, nomawi chawi tur erawhin an match hnuhnung ber an khelh a ngai thung. Napoli chuan Pathianni zan khan Italian football inelna sang bera champion nomawi an chawi.

Diego Armando Maradona Stadium-a inkhelah Napoli hian Victior Osimhen leh Giovani Simeone te goal hmangin an mikhual Sampdoria chu 2-0 in an hneh a, coach Luciano Spalletti chhuah hma an match hnuhnung ber an khar ṭha hle.

Diego Maradona hoin Naples club hian tun hmain Serie A nomawi an chawi tawh, kum 33 zet a liam hnuah Napoli captain Diego Maradona chuan league title a chawi kang leh ta a, club mai ni loin Naples khawpui an lawm.

Champion mah se coach Luciano Spalletti erawh a chhuak dawn. Club thuneitu lamin Spalletti chhuah tur thu an sawi chiang tawh a, coach ber a chhuak a nih chuan player ṭhenkhat pawh chhuak mai thei dinhmunah an ding.

Spalletti chuan, "Ka hma hun chungchang hi ka duhdana thutlukna hi ka siam a ni. Hahchawlh ka mamawh, ka team ṭan takte inkhel chu mahni awmhmun aṭanga nuam ti taka lo ṭan mai mai ka châk," tiin chawlh a duh tih a sawi.

Striker Osimhen chu thawm nei lian pawl a ni. Nigerian striker hian tun season Serie A goal 26 a khung a, European club lian dangte mit a la hle. Striker ṭha zawng mek Manchester United nen sawizawm a ni tawh - Real Madrid lamin thawm an nei a nih pawhin a mak lo ang.