Bottas-a'n contract thar a ziak

Formula 1 team champion lai Mercedes chuan an driver Valtteri Bottas chu contract thar an ziahpui a, season tharah pawh tun season chhunga a car khalh pangngai bawk hi a khalh chhunzawm ang.

Mercedes team tan kum 30 mi Bottas hi Lewis Hamilton nen an inkawp mek, driver number 1 zawk ni lo mah se theihna a neih san avangin champion tura beisei ngam zinga mi a ni - Hamilton erawhin contract thar a la ziak ve rih lo.

Bottas chuan, "Mercedes nen 2021 thleng inremna kan nei thei hi ka lawmin a phurawm ka ti takzet. Tun hnai season kan hman ho kha thlirkir chuan kawng hrang hrangin hma kan sawn nasa hle, season tharah pawh hmalam kan pan ngei ka beisei," a ti.

Tun season inelna hmasa ber Austrian Grand Prix-ah khan Bottass hi pakhatna a ni a, Steiermark GP-ah pahnihna niin a hmaah a teammate Hamilton a thleng. Hungary-ah pathumna dinhmun a luah leh a, Silverstone tlan kawngah erawh a tyre chiang lo vangin dinhmun sang a luah phak lo.

Intlansiak pali an hmachhawn tawh chinah Bottas hian point 58 hmuin pahnihna a ni mek, a tluk loh awmchhun chu a teammate Hamilton a ni - an inkarah point 30 a la awm mek; intlansiak pakhatah point 25 zet a hmuh theih avangin an la inlehthal thei viau.

Coronavirus vangin season dang angin inelna a kaltluang thei lo. Pathianni zan hian British Grand Prix an tlan tawhna Silverstone tlan kawngah bawk inelna an nei leh dawn a, a hming atan 70th Anniversary Grand Prix tih a ni thung ang.