Madrid Open 2020 an ṭhulh

Tennis tournament ngaihhlut hlawh zinga mi Madrid Open chu kuminah an khel thei dawn lo. Spain khawpuia inelna an neih theih loh chhan hi Covid-19 vang a ni a, sorkar thurawn angin inelna buatsaihtu lamin an ṭhulh thu hi an puang.

Clay court inelna hi September 12 aṭangin Madrid-ah khelh tura ruahman a ni. Tournament khelh tur hian Rafael Nadal pawh a inziak lut hman, mahse world number 2 hi a hmel a lan thei dawn bik ta lo - French Open inbuatsaihna a neih tlem phah dawn.

Madrid Open buatsaihtu lam chuan thu chhuah siamin, "Covid-19 chu ziaawm deuh tawh mah se tun hnaiah a hluar thar leh a, hreh tak chungin tournament ṭhulh a ngai," an ti. Sorkara damdawi lam thiam thurawn an hmuh thu an sawi lang tel bawk.

Spain-ah hian mi 302,000 zetin hripui an kai tawh a, an zinga 28,498 chu an thi. Hri leng hi ziaawm deuh tawh mah se a thawh hnihna a thleng leh mek a, a bik takin Madrid leh Aragon bial vel chu a darh nasatna hmun a ni.

Season tira ruahman dan chuan Madrid Open leh French Open hi May thlaa khelh tura tih a ni, mahse coronavirus vangin September thla atan an sawn. Madrid khawpuia inelna awm thei lo tur hi clay court hmang thiam player tan channa lian tak a ni dawn.

Harsatna hrang hrang leng karah Roland Garros lam erawh an inringtawk viau thung. French Open buatsaihtu lam chuan stadium chhungah entu an awm theih an beisei, mipui ṭhutna aṭanga chhutin 60% vel chu stadium-a lut turin ruahmanna an siam der tawh a ni.