India lakah Warner leh Finch ropui

Thawhlehni zan khan Australia-in India wicket 10-in an sawp a, opener David Warner leh Aaron Finch ten thi loin century an siam ve ve. India hian bat hmasain over 49.1-ah run 255 an siam a, Australia hian over 37.4-ah run 258/0 siamin target hi an umpha a ni.

India leh Australia hian ODI match thum an khel dawn a, match hnihna hi January 17 hian Saurashtra Cricket Association Stadium, Rajkot-ah an khel leh ang. Ṭhumvawrah Australia an vannei a, vawm hmasak an thlang. India batsman zingah Shikhar Dhawan (74 runs) leh KL Rahul (47) te an che ṭha a, chutihrualin che ṭha fal an awm loh avangin over 50 pawh an daih lo. Australia bowler Mitchell Starc chuan wicket thum lain run 56 a pe a, Pat Cummins (44/2) leh Kane Richardson (43/2) ten wicket hnih ve ve an la bawk. 

Wicket khat latu Adam Zampa lahin India captain Virat Kohli chu run 16 chauh a siam tiha a vawm hlum avangin a hnahthawh hi a pawimawh hle. Australia bat hun a thleng a, David Warner leh Aaron Finch ten an theihna phochhuah avangin dawl zawrin India bowler-te an zawr. Warner hian four vawi 17 leh six vawi thum vaw chhuakin run 128 a siam a, Finch pawhin four vawi 13 leh six vawi khat vaw bawkin run 110 a siam. India bowler Mohammed Shami, Kuldeep Yadav leh Ravindra Jadeja te an che thei lo a, an chhuanvawr Jasprit Bumrah pawhin danglamna a  thlen thei bik lo.

Australia-in India an sawp ber ṭum a ni a, Warner leh Finch te siam run 255 hi Men in Blue laka partnership ṭha ber record a ni. Warner hian Travis Head nen kum 2017 khan Pakistan lakah run 284 an siam tawh a, kum 2015 khan  Afghanistan lakah Steve Smith nen run 260 an siam tawh bawk.