Murray leh Clijsters tan wildcard

US Open buatsaihtu lam chuan duhsak takin Andy Murray leh Kim Clijsters te chu wildcard an pe a, player pahnih hian qualifier khelh hah ngai loin Grand Slam tournament hi an khel thei dawn tihna a ni.

Covid-19 vangin March thla aṭang khan tennis inelna a awm lo. August thla aṭangin tournament ṭhenkhat chu khelh chhunzawm leh ṭan a ni a, US Open hma hian New York khawpuiah Western & Southern Open khelh tum a ni bawk.

US Open hi a tira an ruahman dan pangngaiin August 31 aṭanga September 13 chhungin khelh a ni dawn. A hmunah entu fans an awm dawn lo a, inkaihhruaina dan khirh tak zawm tur a awm dawn - Europe lama an kir leh hunah khung hran an ngai bawk ang. Britain tlangval Murray hian 2012 khan US Open nomawi hi a lo chawi tawh a, 2017 leh 2019 erawh hliam vangin a inlan thei lo. Kuminah hian inlan pawh ni se rinkai a ni phak dawn lo, hun rei tak hliam vanga a chawlh hnuah an inkhel pangngai thei ve leh dawn ṭan chauh a ni.

New York khawpuia inelnaah hian a thleng sang chu an cham rei a ngai dawn. September thla tawpa khelh tur French Open nen phei chuan a hun a inhnaihchilh avangin clay court lama khel thiam player tan chuan US Open khelh loh mai hi a finthlak a rinawm. US Open champion lai Rafael Nadal chu a inhnudawk tawh a, Paris khawpuia a kal hmain Italian Open lamah a inlan a rinawm. Hmeichhe world number 1 Ashleigh Barty pawhin US a pan loh tur thu a lo tichiang tawh bawk.