US mi hausain Roma a lei

US billionaire Dan Friedkin chuan Italian club AS Roma chu pound maktaduai 532-in a lei a, August thla tawp aṭang hian neitu nihna a chelh pumhlum ṭan ang - club leh a leitu lam chuan inremna hi an siam fel tawh.

Friedkin chuan, "Indawrna leh ruahmanna engkim a kaltluang em em a, hun rei lote chhungin a fel vek ang. AS Roma chhungkua kan ni fel ṭep e," tiin a sawi. Friedkin hi sumdawng hausa a ni a, car, entertainment leh Hospitality industry-te chu a sum hmuhna langsar an ni.

US sumdawng mi tho James Pallotta chuan 2012 khan Roma hi a lei a, a tirah beiseina nei sang viau mah se season riat a kalpui hnuah club ṭantute duh leh rin ang chu a thlenpui lo; tunah chuan fans lamin beiseina thar an nei leh phawt ang.

Pallotta hun lai khan Serie A-ah vawi thum chu pahnihna an ni a, 2018 khan Champions League semifinal an thleng bawk - hemi ṭum hian Barcelona an hneh. Season liam ta khan pangana dinhmun an luah a, European football khel dawn mah se UCL-ah erawh an inlan phak dawn lo.