CYMA Football ‘Judgement Night’ : Zanin dar 8:00-ah Venghnuai Vs Salem Veng

LBS Suzuki 21st Inter Branch YMA Football Tournament-ah 'Derby Match' hmuh tur a awm dawn. Zanin dar 8:00 hian Venghnuaiin an veng aṭanga indang Salem Veng an hmachhawn dawn a, derby match a nih miau avangin 'chak hrim hrim' hi final luh tluk zetin a pawimawh.

RG Stadium hi Salem Veng huam chhunga awm a ni a, tun hma chuan Venghnuai huam chhunga mi tihna a ni. Chumi awmzia chu Aizawl South Derby hi an veng huamchhungah an khel dawn tihna a ni a, hei hian boruak a ti 'hot' sawt dawn - security pawh a ṭhat a ngai ang.

A hot nghal

Venghnuai hian tun hma chuan Ari Benjamin LR Hmar, K. Lalhmangaiha, Lalengliana, Israel Ramtharhmangaih-zuala, B. Lalrinkima Lalremmawia, Lalremtluanga leh keeper Sawma te an kawl ṭhin a, CYMA football-ah pawh quarterfinal chu an lo thleng tawh ṭhin.

Mizo football-a sulhnu nei ṭha zinga mi Ari Benjamin chuan, "Kan hunlai chuan Salem Veng chuan min tluk pha lo deuh," tiin Vanglaini a hrilh a, tun hunah hian tu nge ṭha zawk tih chu zanin hian a hriat ang.

Salem Veng hian CYMA Football hnuhnung berah quarterfinal an lut a, Hnahthial lakah an tlawm. Tun ṭumah hian semifinal an lut ta a, Venghnuai tan CYMA Football-a semifinal an luhna hmasa bera ni bawk a, final la khel ngai lo ve ve an ni.

Tap chhak titi

Quarterfinal khelh zawhah Venghnuaiah i leng a nih chuan CYMA Football bak an sawi lo a, Salem Vengah pawh chuti tho chu a ni. Champion beiseina an neih ve ve avangin veng pahnih titi ber a tling pha a, veng inṭhenawm an nih bawk avangin titi thiam deuh kam chhuak chu chilthli uai duah duaha ngaihthlak theih a ni hial ang.

Salem Veng coach Lalrindika Hmar hi Venghnuai pa a ni a, veng tana theihtawp chhuah ṭhintu a ni. Rindika Hmar hi MPL-a FC Venghnuai hlangkaitu a ni a, veng tan a hnathawh ropui viau mah se ṭhenkhat chuan Salem Veng a enkawl hi a hriathiam lo.

Rindika Hmar chuan, "Venghnuaiah hian sports committee-ah ka tel. Veng mipuite hian kan veng tan theihtawp ka lo chhuah tawh vangin tun CYMA Football-ah pawh sawmtu ṭhahnem tak ka nei bawk nen kan veng tan chuan coach ah i ruat lo ila, a duh naah kal rawh se an tia. Hna ṭha taka thawk turin min thlah zalen a, tunah ka veng ngei ka hmachhawn dawn, keini aia team ṭha an ni. Ka hna a nih avangin theihtawp erawh ka chhuah ang, ka veng te duhsakna ka hlan e," tiin Vanglaini a hrilh.

Venghnuai coach K. Lalthlamuana hi Rindika Hmar hnuaiah first division an awm lai aṭanga awm a ni a, an inhre chiang dun hle. An pahnih hian FC Venghnuai chu MPL-a an kai pui bakah MPL Under 18-ah an champion pui a, MPL U18-ah kuminah champion lehin Thlamuana hian ama pualin a enkawl tawh thung.

A hmuhnawm dawn

Salem Veng leh Venghnuai hian player ṭha an kawl ve ve a, field pawn boruak dah ṭhat pawhin inkhel hmuhnawm tak chhawp chhuak thei tur an ni hrim hrim. Venghnuai hi team nem zawka ngaih ni mah se Lalsangzuala Hmar enkawl Bethlehem Vengthlang an hneh theih avangin inrintawkna nasa tak an nei ang.

Venghnuai hian MPL keeper langsar zinga mi Joel B. Lalramchhana an kawl a, Hyderabad reserve-a khel Laldanmawia chu tlarhnung kulhpui niin midfield-ah AIFF Elite Academy chhuak Eric Remruatpuia Chhangte leh tualchhunga tawnhriat nei ṭha TS Zadeng te an kawl.

Midfield-ah pawh Sudeva tana khel Vanlalzahawma te an la awm a, FC Venghnuai tana utility player C. Ngurnuntluanga bakah Sawma Tlangte leh RM Zothansanga te goal nawr turin an awm. An fitness a ṭha a, player an inhrechiang bawk a, Salem Veng tan zuam a rem lo ang.

Venghnuai coach Thlamuana chuan, "A phurawm laiin a huphurhawmna lai pawh a awm. Salem Vengin semifinal an luh chiah khan boruak a awm nghal a, player chauh ni loin fan-te pawhin Derby Match hun hi an nghakhlel a ni," tiin Vanglaini a hrilh.

Salem Veng hi Joseph Lalnunpuia'n a la ho thei a, tlarhnung leh striker-a hman theih David Lalchhuanawma te an kawl. Midfield-ah NorthEast United tana khel phak Emmuanuel Lalchhanchhuaha an kawl a, Upa C. Keikhuma Memorial Football Tournament final-a hattrick siam thei Labiakdika te an nei. Coach pahnihah Rindika Hmar-in tawnhriat a nei ṭha zawk a, a nawlpuia laka player an upa zawk bawk a, Salem Veng hi rinkai zawk an ni ang.