Bawngkawn hmaah Tlangnuam an lam leh thei ang em?

Football thiam veng an sawiin Tlangnuam an sawi tel ngai lo. Tun ṭum CYMA Football-ah erawh Tlangnuam hming sawi a ṭul tlat. Zirna sikul ṭha St Paul's Hr Sec School leh Mary Mount School vangin Tlangnuam a lar a, tunah erawh football hmangin an hming an chher mek. Tlangnuam hian semifinal an thleng satliah lo - champion ngun ber Armed Veng leh champion rinkai Durtlang an hneh tlat.

Vawiin tlai dar 4:00 hian Tlangnuamin semifinal-ah Armed Veng leh Durtlang aia la ṭha zawk Bawngkawn an hmachhawn dawn a, 1st Bn MAP Ground leh Lammuala lam thai tawhtu Tlangnuam hian RG Stadium-ah hnehna hlado an chham thei ang em, tih chu a hriat thuai dawn. Tlangnuamin a khaw nawtin RG Stadium an pan a rinawm a, Bawngkawn an la tam zawk hial ang. Football hmuhnawm hmuh châk neutral fan an la awm bawk dawn.

Phurna a let

Bawngkawn coach K. Malsawmkima hi I League-a Aizawl FC tlinpuitu coach a ni a, tualchhung football-ah sulhnu a nei ṭha hle. Mala hi kum hnih thum a chawl a, chumi hnu chuan MPL hnuhnung ber khan Chanmari FC tan season tawp lamah a rawn kir.

Mala chuan, "Chanmari FC ka rawn kir khan result kan nei ṭha lo bawk nen football nuam ka tihna tak tak ang kha ka nei lo. Tunah erawh squad kan nei ṭha bawk a, football-a ka phurna ṭhin ang kha ka nei let a, nuam pawh ka ti leh tawh khawp mai," tiin Vanglaini a hrilh.

Bawngkawn hian semifinal kalkawngah champion rinkai zinga tel phak Republic Veng chauh an hmachhawn a, chutihrualin an squad chhahzia erawh a chiang. Mala hote hian match nga aṭangin goal 27 an khung tawh a, player 11 ngawtin goal an khung tawh. Kil tin aṭangin goal an khung a, chutihrualin goal sarih khung tawhtu Odisha FC winger Isak Vanlalruatfela chu enbik tur a ni ang.

Goal 28 khung thei

Tlangnuam hian champion rinkai ni phak team hnih Armed Veng leh Durtlang an hneh thei a, semifinal thleng tur hian goal 28 an khung. Chutihrualin Bawngkawn aiin Tlangnuam hian match khatin an khel tam tih hriat a ṭha.

Tun ṭum inelnaah hian Tlangnuam tan Vincent Lalduhawma'n hming a chher a, match tinah goal la khung vekin goal kua a khung tawh. Goal nawr kawngah CVL Remtluanga a ṭangkai bawk.

Chutihrualin Tlangnuam hi team ṭha bik an nih loh avangin Bawngkawn hneh tur chuan team anga an thawh ho lehzual a ṭul dawn. Captain Jones Lalṭhakima tlarhnungah a ṭangkai ṭhin a, goalkeeper Lalbiakkima an kawl avangin penalty shootout hmachhawn pawh an hlau lo ang.

Mahse, CYMA Football-ah semifinal aṭangin extra time a awm dawn a, penalty shootout thlen hi thil harsa a tling ang. Tlangnuamin team ṭha zawk an hmachhawn ṭumah pawh huaisen takin an khel ṭhin a, Bawngkawn lakah pawh an chhunzawm a ṭul dawn a ni.