Europa Conference League final : David Moyes leh West Ham tan hmingchherna hun ṭha

European football-ah club inelna pathum a awm a, Champions League, Europa League leh Europa Conference League te an ni - Europa League champion kan hre tawh a, Champions League final kan la bak a, ECL final zaninah khelh a ni dawn bawk.

Zanin dar 12:30 hian Fortuna Arena, Prague-Vrsovice, Czech Republic-ah West Ham leh Fiorentina ten European football-a champion-na hun ṭha an nei dawn a, rei tak nomawi chawi lo tawh club pahnih tan inelna hlu bik a tling.

Fortuna Arena-ah hian mipui 19,370 chauh an leng a, West Ham pawhin ticket 4,890 bak an dawng thei lo - mahse, West Ham fans 20,000 chuangin Prague khawpui an pan niin khawthlang media-te chuan an tarlang!

A tawi zawnga sawi chuan zanin inkhel boruak a 'hot' dawn a, Champions League final angin star langsar tam dawn lo mah se a hmuhnawmna a nep phah lo ang - meng rei turin lo inpeih rawh le.

A rei ta

West Ham hian kum 1965 khan European Cup Winners' Cup final chu Wembley Stadium-ah an khel a, 1860 Munich hnehin champion nomawi an chawi - mahse, hemi hnu hian European football-ah an champion leh tawh lo!

European football-a Hammers an champion hnuhnung bera nau piangte khan tunah chuan tu leh fa an nei tawh - heti zawnga chhut ringawt pawhin West Ham tana ECL nomawi hlut turzia hi a ngaihtuah theih a, champion loh hlauin fans tam tak chu an muhil thei tawh lo hial ang.

West Ham-in nomawi hrim hrim an chawi lohna chin hi a rei tawh - kum 1980 khan FA Cup-ah an champion a, hemi hnu hian nomawi an khawih leh tawh lo hrim hrim! Zaninah an chak chuan a hlutna hi thua sawifiah theih chi a ni dawn lo.

Fiorentina hi hmai uang thei an ni bik lo. 1960-61 season khan European Cup Winners' Cup-ah an champion a, hemi hnu hian European nomawi an chawi leh tawh lo. Nomawi hrim hrim an chawi hnuhnun ber hi 2001 kha niin, Coppa Italia-ah an champion.

Chak duh Moyes

West Ham boss David Moyes chuan kut ruaka Prague khawpui hawsan an tum loh thu a sawi a, London khawpui an kir leh hunah chuan ECL nomawi keng ngei chunga luh a duh.

Scottish coach chuan, "ECL final kan lut hi kan lawm takzet a, he club tan hian hlawhtlinna ropui tak a ni. Mahse, tunah chuan final khelh a, hnehna chan hi kan tum leh tur chu a ni," a ti a, final luha lungawi mai an tum loh thu a sawi.

Hammers tan hnehna chang turin nipui transfer-a chhuak ngei tura ngaih captain Declan Rice a pawimawh leh dawn a, attacking midfielder Lucas Paquetá sawi hmaih a thiang lo a, Michail Antonio pawhin a goal khungna pheikhawk a bun a ṭul ang.

Premier League first-choice Lukas Fabianski aia cup lam inelnaa si ban nghak tura thlan Alphonse Areola tan pawh thlan a nih chhan pholan a ṭul a, Prague khawpuia nelsa Czech player pahnih Tomas Soucek leh Vladimir Coufal ten theihna pholan a ṭul bawk.

A hlutna

West Ham hian ECL nomawi hi chawi ta ngat se, an player-te hian hriatreng an hlawh dawn a ni satliah mai lo ang - an lim hial din duh tam tak an awm ang a, Manchester United-a a hun hman vanga hming chhe tawh hnu David Moyes tan a hming tihropuina hun ṭha tak a ni ang.

Moyes chuan, "Hnehna chang ta ila, kan lim hi an din hial ang em, ka hre lo. Mahse, he club-a mi zawng zawngten an hriatreng theihna hun ṭha ka player-te hi chuan an nei dawn a ni - a danglam takzet," a ti a, ECL final chu an tan club thawnthu ziah tharna hun remchang a nih thu a sawi.

Mahse, Moyes leh a naute tan awlsam taka chak theih a ni dawn bik lo. Fiorentina hian goal nawr turin, tun season-a goal 14 leh assist vawi li nei tawh Nicolas González, goal 17 khung tawhtu Arthur Cabral te an nei.

Midfield-ah AC Milan midfielder hlui Giacomo Bonaventura a la rintlak reng a, Morocco international Sofyan Amrabat lam hmaih a harsa a, Real Madrid lamah hlawhchham mah se Luka Jovic pawh a la rintlak reng.

Hmabak chu

West Ham-in nomawi chawi an châk takzet tih a hriat a, Fiorentina thawnthu a danglam lo - Serie A-ah Fiorentina hi pariatna ni hram mah se, an league match hnuhnung paliah an tlawm miah lo.

Fiorentina hian tun season-ah final pahnih an lut a, Europa Conference League final bakah hian Coppa Italia final an lut. Mahse, Champions League final khel tur Inter Milan lakah an tlawm a, rilru na takin hun an hmang.

Zaninah rilru na thawidamna hun ṭha an nei dawn a, bawhpelh loh hram an duh ang. Fiorentina boss Vincenzo Italiano chuan, "Europe-a ka final hmasa ber a ni a, final luh hi ka tan chuan a lawmawm hle.

"Kan final zinkawng hi kan hre reng tawh dawn a, tunah erawh hmabak hlenchhuah tur kan la nei," a ti - final zinkawng tih ai chuan champion zinkawng tia an sulhnu thlirlet a châk zawk.