Tunlai inchai a hmuhnawm tawk lo - Duata

Mizo palian inchaia sulhnu nei ṭha, hnehtu a tawn loh avanga a champion kawnghren chawlhsantu Vanlalduata chuan Mizo inchai chu tun hma anga a hmuhnawm tawk tawh loh thu a sawi!

Vanlalduata hian kum 1988 khan a hunlaia Mizo inchai chak Chala chu naupangtê ni chungin a hneh a, hemi hnuah hian a champion kawnghren chuhsak theitu a tawng lo.

Duata chuan, "Kei chu attacking game khel ṭhin ka ni a, ka khingpuite bawhbeh thlap hi ka duhdan a ni ṭhin. Mahse, tunlaiah chuan an fimkhur tawh lutuk a, in bawhbeh ai chuan in nawr chhuah ringawt an tum a, a hmuhnawm tur angin a hmuhnawm tawk ṭhin lo.

"Kei Mizo inchai ngaina em em pawhin hmuhnawm ka tih loh chuan, mipui tan chuan a ngaihna a awm lo a ni," a ti a, Mizo inchai tivul leh turin Mizo wrestler-ten mawhphurhna an neih thu a sawi.

Mizo inchai chak hmingthang Vanlalduata hian 'John-a nen khelmual titi' programme-ah a ngaihdan hi a sawi chhuak a, inchai khawvela hun a hman dan hrang hrang, Mizo palian inchai chak Saidingliana Sailo nena an chanchin ngaihnawm tak te, mi tam takin a hneh tura an ngaih loh Chala a cho dan te, thil hrang hrang ngaihnawm tak tak a sawi chhuak a ni.

'John-a nen khelmual titi' programme-a Duata kawmna hi Zonet Zawlbukah zanin dar 8:00 hian en theih tura pekchhuah a ni dawn a, Zonet YouTube channel-ah member tan a en theih bawk ang.