Quarterfinal-ah Zverev a lut

Alexander Zverev chuan player ṭha Grigor Dimitrov hnehin French Open quarterfinal a lut, zanin hian Tomas Martin Etcheverry nen semifinal luh inchuhin an inkhel zui leh nghal dawn a ni.

Thawhṭanni zan khan Court Philippe Chatrier-ah Zverev hi a inlan a, a zawna a vawi thum nan zan lamah match a khel. German tlangval hian seeded 28-na Dimitrov hi 6-1, 6-4, 6-3 in a hneh.

Clay court inelna lian berah Zverev-a'n tun hnai kum ruk chhunga a vawi nga nan quarterfinal a lut thei hial, a inkhelh thiamna hmun a nih avangin hun rei tak chhung a nghah tawh Grand Slam nomawi chu kuminah hian a beisei sang ngam ang.

Kum 26 mi Zverev chuan, "Rilru hah leh chak loh hlau lutuka inkhelh hi chuan result ṭha neih a harsa ṭhin, chuvangin engthawl leh zalen taka awm dan ka zir nasa hle a, ka thiam ve ta hle ni pawhin ka hria.

"A bik takin player ṭha Dimitrov te ang kan hmachhawn a nih chuan kan ṭhat dan bera kan khelh hi a ngai ṭhin. Quarterfinal-ah pawh nuam ti takin ka khelh chhunzawm theih ka beisei," a ti.

Zverev-a hmachhawn leh tur Etcheverry hian inkhel dangah seeded 27-na Yoshihito Nishioka chu 7-6(8), 6-0, 6-1 in a lo hneh ve thung, a thlen phak loh leh rin phak bakah a cheng chhunzawm mek.

Argentine tlangval Etcheverry-a'n French Open hma kha chuan Grand Slam match vawi ruk a khelhah ṭum khat chiah hnehna a chang, tun inelna neih laiah erawh Nishioka hma hian seeded 18-na Alex de Minaur leh seeded 15-na Borna Coric te a lo hneh tawh bawk a ni.

Inkhel dangah Holger Rune a chak hram. Seeded parukna Rune hian Francisco Cerundolo lakah fiahna hautak paltlangin, inkhel hmuhnawm takah 7-6(3), 3-6, 6-4, 1-6, 7-6(10-7) in a chak - hnehna chang tur hian darkar thum leh minute 59 chhung hun a hmang.

Rune hian seeded palina Casper Ruud a tum leh dawn. Ruud-a'n inkhel dangah Nicolas Jarry chu 7-6(3), 7-5, 7-5 in a lo hneh ve thung. Season hmasa quarterfinal-ah khan Rune leh Ruud te hi an lo intawng tawh a, Ruud a chak zawk a ni.