Tottenham coach thar Ange Postecoglou

Premier League club talbuai Tottenham Hotspur chuan coach thar an nei ta a, Celtic boss Ange Postecoglou chu kum li chhung atan contract an ziahpui - a man atan Celtic hnenah pound maktaduai nga an pe nia sawi a ni.

Australian coach hian London club-ah hian engzat nge a hlawh dawn tarlan a awm lo a, Celtic-ah kum khata pound maktaduai hnih a hlawh avangin Spurs-a a hlawh hi Scottish club-a a hlawh nen chuan a inthlauh a rinawm.

Tottenham chairman Daniel Levy chuan, "Ange-a'n kan club a zawm thei hi kan lawm takzet. Ange hi a êng zawnga thil thlir ṭhin, attacking football hmuhnawm tak pho chhuak ṭhin a ni a, player tuai hriam lamah a hming a ṭhain, club tana pawimawh êm êm club leh academy inpawhna pawimawhzia hrechiangtu a ni bawk," a ti.

Mauricio Pochettino-a'n Champions League final 2018-19 season a hruai thlen hnuah Spurs hian manager nghet pali an nei ta a, Ange hma hian Jose Mourinho, Nuno Espirito Santo leh Antonio Conte te chu coach atan an lo nei tawh a ni.

Celtic sulhnu

Kum 57 mi Postecoglou hi Australian zinga Premier League club enkawl thei hmasa ber a ni. June 2021 khan Celtic hi zawmin a tirah talbuai deuh mah se a insiamṭha rang hle - a season hmasa berah Scottish Premiership leh Scottish League Cup-ah a champion pui nghal.

Tun season-ah phei chuan Scottish football-a nomawi chawi theih pathum Scottish Premiership, Scottish Cup leh Scottish League Cup-ah te a champion a, Celtic tana tualchhung football inelna nomawi chawi vek thei coach panga zingah a tel - Jock Stein, Martin O'Neill, Brendan Rodgers leh Neil Lennon te hnung a zui.

Celtic chief executive Michael Nicholson chuan, "Ange nena hnathawh kha nuam kan ti a, football manager ṭha tak a nih piahlamah pa ṭha tak a ni. Phur tak leh tum ruhna nen kan club a enkawl a, hlawhtlinna ropui tak min chanpui a ni.

"Ange hi Celtic-a cham zel tur pawhin kan duh a, ani kan chân hi pawi pawh kan ti. Mahse, chona thar hmachhawn a ṭulin a hria a, chu chu kan zahsak êm êm a ni," a ti a, an coach chu ui tak chunga an thlah thu a sawi.

Siamṭhat ngai

Postecoglou tan hna a awlsam dawn lo - Spurs hi season hman zawh takah khan an talbuai takzet. March thla khan coach Antonio Conte-a'n a chhuahsan a, coach lailawk atan Cristian Stellini ruat mah se beisei ang result an neih loh avangin coach lailawk hi an ban!

Stellini an ban hnuah Ryan Mason chu season tawp thleng atan coach turin an ruat a, eng ruai an ang chuang lo. Premier League table-ah pariatna ni chungin season an khar a, season tharah European football an khel dawn lo.

Mahse, Postecoglou tan club talbuai enkawl hi thil thar a ni lo. Celtic a pan khan point 25 ngawta Rangers phak lo a, an champion loh zawh chiah season a ni a, chief executive Peter Lawwell chu Dominic McKay-a'n a thlak a, Nick Hammond chu head of football operations aṭangin a bang a, rei tak captain ni tawh Scott Brown chuan Aberdeen a zawmsan bawk.

Spurs pawh hian sporting director bang ta Fabio Paratici hmun ruak luah tur an zawng mek a, captain chhuanvawr Harry Kane chu a chhuah mai rinna a lian viau bawk - Real Madrid-in Kane hi an duh.

Real-ah maw?

Tun season-a beisei phak lo Real hian striker chhuanvawr Karim Benzema an chân dawn avangin Harry Kane lam an hawi nia sawi a ni a, Real hian Napoli forward Victor Osimhen, Inter Milan striker Lautaro Martinez, Chelsea duhlai Kai Havertz leh Juventus striker Dusan Vlahovic chu an duh zingah an telh bawk.

Tottenham chairman Daniel Levy chuan Kane hi pound maktaduai 100 aia tlawma chhuahtir a tum lo nia sawi a awm a, mahse, Real hian Borussia Dortmund midfielder Jude Bellingham an dawr bawk avangin heti zat sum hi insen an huam lo nia sawi a ni.

Kum 29 mi Kane hian Spurs tan match 435-ah goal 280 khungin, Premier League-a goal khung hnem ber Alan Shearer-a goal khung zat goal 260 khung turin Premier League-ah goal 47 khung a la bak bawk.

Nomawi chawi la nei lo Kane hian nomawi chawi a châk a, Postecoglou tan Kane hi a chhuak a nih chuan a hmun ruak luah tur zawn chu hna hautak a ni dawn.

Hmachhawp

Spurs chuan Postecoglou hi a player duhzawng lei turin zalenna an pe dawn nia sawi a ni a, Celtic striker Kyogo Furuhashi hming a ri ring hle - season hman zawh takah khan inelna hrang hrangah goal 34 a khung.

Furuhashi hian Celtic tan inelna hrang hrangah match 83 khel tawhin goal 54 a khungsak a, Kane nena khaikhin rual ni lo mah se striker theihna nei sang tak a ni tih erawh a chiang.

Pound maktaduai 40 man bawr vel ni tura ngaih, Leicester City attacking midfielder James Maddison hming a ri a, chhuak tur anga sawi Hugo Lloris thlak turin Brentford keeper David Raya an duh nia sawi a awm bawk.

Davinson Sanchez pawh chhuak tur anga sawi thawm a awm a, Eric Dier contract thar chungchanga inbiakna a tawp rih bawk - Postecoglou tan hmalakna tur tam tak a awm.

Tu maw a nih?

Postecoglou hian player a nih laiin South Melbourne tan a khel ṭhin a, Hungary legend Ferenc Puskas hnuaiah khelin, a coaching kalphung pawh Puskas hnen aṭanga a zir a nih thu a sawi ṭhin.

A club khelhna South Melbourne aṭang hian a coaching career ṭanin, league-ah vawi hnih champion puiin, Oceania Club Championship-ah nomawi a chawipui a, Brisbane Roar chu 2011 & 2012 khan a zawnin a champion pui bawk.

Kum 2013 khan Australia enkawlin, World Cup a hruai thleng a, Asian Cup 2015-ah a champion pui bawk. J League club Yokohama F Marinos chu kum 2019 khan league champion a nihpui a, kum 15 zet an champion tawh loh chu a tihtawpsak.

Celtic a enkawl tirh khan club fans tam zawkin tu nge a nih an hre lo - kum hnih hnua a chhuahsan dawn meuh chuan ui takin an thlah a, Spurs fan-ten he thawnthu ngaihnawm hi an club-ah ziah chhunzawma a awm an beisei ang.