Pulisic hma hun a chiang lo

Christian Pulisic chuan Chelsea tana khel phak tura beih a tum thu a sawi a, chutihrualin infiamna khawvelah chuan thil engpawh thleng thei a nih thu a sawi chhuak tel bawk.

United States international hian 2019 khan Borussia Dortmund aṭangin Chelsea hi a zawm a, euro maktaduai 64 man zet niin US player zingah chuan a man to ber a ni hial.

Beisei angin Pulisic hian Blues tan a khel chhuak rih lo, a khelh ṭhat loh bakah khelhna hmun nghet a chang mumal lo bawk - hei vang hian a hma hun a chiang lo mek.

Kum 24 mi Pulisic chuan, "Tunah chuan Chelsea player ka ni a, ram tana ka feh chhuah hnuah pawh hian Stamford Bridge-ah bawk ka kir leh ang. Mahse, thil hi a inthlak kual ve reng a, a danglam ve zel thei bawk a ni.

"Hun rei tak chhung chu ka duh leh tum angin ka lo kal ve tawh a, tun hnaiah duhthusam lo deuha thil thleng a awm ve pawh hi ka pawm thiam a ngai," tiin a sawi a, tunah chuan an ram team tan chauh rilru a pek thu a sawi bawk.

Pulisic hi tunah chuan United States tan CONCACAF Nations League khel turin a feh chhuak mek, season a tawp rih avangin tun hnaiah chuan Blues training-na hmun lamah a inlan rih mai dawn lo niin a lang.

London club hian Graham Potter an ban hnuah Frank Lampard an ruai lailawk a, season thar aṭang chuan Tottenham manager hlui Mauricio Pochettino kaihhruaina hnuaiah an khel ang.

Premier League season liam taah khan 12-na niin, kum 1994 hnua season an hman chhiat ber ṭum a ni. Argentine coach Poch tan Chelsea dinthar leh turin hna a tam dawn hle a ni.