Sindhu leh Prannoy te an tla

Indian badminton khel thiam PV Sindhu leh HS Prannoy te chu Singapore Open-ah hneh nei loin an tla nghal a, hetih lai hian world number 1 hlui Kidambi Srilkanth erawhin a khingpui a hneh thung.

World championship 2021 silver medalist Srikanth hian Kantaphon Wangcharoen chu 21-15, 21-19 in a hneh a, a match lehpekah chuan Kenta Nishimoto leh Chia Hao Lee inkhela chak zawk a hmachhawn leh dawn a ni.

Malaysia Masters champion hlim Prannoy erawhin a khelh ṭhat a chhawm nung thei lo. Seeded pathumna Kodai Naraoka nen minute 56 an inkhelh hnuin 15-21, 19-21 in a chak lo zawkah a ṭang.

Hmeichhe singles lamah champion lai PV Sindhu tan world number 1 Akane Yamaguchi a hriam mah mah. Japanese nula hian Sindhu hi darkar khat chuang hretah 21-18, 19-21, 17-21 in a hneh.

Olympic medal vawi hnih la tawh Sindhu tan season duhawm lo a ni chhunzawm zel. Kar hmasa lawk khan Thailand Open aṭangin hneh nei loin a zinkawng a lo tawp tawh bawk a ni.

Doubles pair MR Arjun leh Dhruv Kapila te erawhin bul an ṭan fuh, an match hmasa bera an khingpui Lucas Corvee leh Ronan Labar te chu 21-16, 21-15 in an hneh ve thung.