Perez inlan dawn lo

Pathianni zan dar 6:40 hian Silverstone tlan kawngah Formula 1 inelna 70th Anniversary Grand Prix an tlan dawn a, intlansiakah hian Covid-19 kai lai Sergio Perez chu a la dam loh avangin a inlan thei dawn lo - Racing Point tan hian Nico Hulkenberg a inlan thung ang.

Kum 30 mi Perez hi British Grand Prix an tlan hma khan coronavirus a kai tih hriatchhuah a ni a, tun kar tawpa inelna an neih dawn hnaia endik leh niin hri lak aṭang hian a la fihlim lo. Natna leh harsatna nei hran lo mah se khung hran a la ni.

Thuchhuah siamin Racing Point chuan, "Inelna hmachhawn thei dinhmunah Perez a la ding lo a, a hmunruak luah turin Nico Hulkenberg a awm leh ang. Kar hmasa pawh khan Nico hian ṭha takin inelna a hmachhawn tawh, tun karah pawh a lakah beiseina kan nei sang," an ti.