Swiatek hmaah Gauff

French Open 2022 final-a intawng Iga Swiatek leh Coco Gauff te chu quarterfinal-ah an intawng dawn, vawiin tlai hian player ṭha pahnih hian semfinal lut zawk nih an inchuh dawn a ni.

Thawhṭanni zan khan Swiatek hi Lesia Tsurenko nen an inkhel, minute 31 an inkhelh chhungin Swiatek hi 5-1 in a chungnung a, a khingpui hi hliam vangin a inkhel chhunzawm thei ve ta lo.

Ukrainian nula Tsurenko chuan, "Iga nena inkhelh hi ka thil chak leh duhthusam zinga mi a ni a, ka inkhel tluan ve thei ta lo kha pawi ka ti takzet," tiin a sawi a, match hnuhnung zawk an khelh lai pawhin harsatna a tawk tawh tih a sawi bawk.

Inkhel dangah Coco Gauff chuan Anna Karolina Schmiedlova chu 7-5, 6-2 in a lo hneh ve bawk. Season hmasa final-ah khan Gauff hian Swiatek hi 6-1, 6-3 a ngam loin a vanduai zawkah a ṭang.

American tleirawl Gauff chuan, "French Open final-ah Iga Swiatek ka ngam lo tawh a, a hnuah inkhelh leh ka châk hle. A bik takin Paris khawpuiah ngei inkhelh leh ka châk ṭhin, tunah a thleng dik dawn," tiin a sawi.

Last 16 inkhel dangah Ons Jabeur chuan Bernarda Pera chu 6-3, 6-1 a hnehin quarterfinal a inhlangkai ve bawk. A match lehpekah chuan seeded 14-na Beatriz Haddad Maia nen an inhmachhawn leh ang.

Season hmasa khan Tunisian nula Jabeur hian Wimbledon leh US Open-ah final a lut a, a chak lo zawkah a ṭang ve ve. Roland Garros-ah erawh hneh nei loin a tla a, nikum nena khaikhin chuan kuminah a che ṭha rih hle.