ISL-ah Toure kan hmu mai thei

Indian Super League-ah Yaya Toure hmuh a hnai - Manchester City legend aiawhtu Harcus Consultancy Group chuan ISL club FC Goa leh Bengaluru FC biain an player hi an duh leh duh loh an zawt!

Toure hian Manchester City tana a khelh laiin kar khatah £230,000 a hlawh ṭhin a, tunah erawh kum 37 mi a nih tawh avangin kum khata dollar maktaduai 1.5 (Vaibelchhe 11.25) a hlawh phak chuan Indian club tana khelh a pawiti lo. 

Hei mai hi a la ni lo cheu - kum khata dollar maktaduai 1.5 hlawh hi Toure aiawh ten Indian club an dawrna a ni mai a, Ivorian midfielder hian kum khata $500,000 (vaibelchhe 3.75) hlawh a pawiti lo niin an sawi. FC Goa director of football Ravi Puskur chuan, "Ani ang player ṭha leh larin India pan a duh tih kan hriatin mak kan ti a, a hlawh tur kan ngaihtuahin kan dawr ngam lo mai mai zawk a ni," a ti a, Toure aiawh ten an dawr ngei thu a sawi lang. 

Bengaluru FC CEO Mandar Tamhane chuan, "Harcus Consultancy hian min rawn be ngei a, mahse ka la chhang rih lo a ni," tiin Toure lakluh tumna an neih loh thu a sawi. India rama league sang berah hian club-te chu season khatah player hlawh atan vaibelchhe 16.5 bak an sen phalsak an ni lo a, mahse hei hian 'marquee players' a huam lo thung. Ivory Coast tana vawi 101 inlan thei Toure hian City bakah Barcelona, Olympiakos leh Chinese club Qingdao Huanghai tan a khel tawh a, vaibelchhe 3.75 hlawh tura India a lo pan a nih chuan ATK-Mohun Bagan striker Roy Krishna (vaibelchhe 4.5) hlawh pawh a phak dawn lo tihna a ni.