Sindhu-i'n training chhunzawm

Hun rei tak chhung training muamal a neih loh hnuah PV Sindhu chuan Zirtawpni aṭang khan training a zawm leh ta. Badminton World Federation chuan engtik hunah nge tournament an khelh ṭan theih dawn tih erawh an la sawi lang lo.

Sports Authority of India (SAI) chuan SAI Gopi Chand Academy, Hyderabad-ah training camp a buatsaih a, he hmunah hian world champion Sindhu pawh a tel a ni - a coach thar Park Tae-Sang kaihhruaina hnuaiah a inzir ang.

Rio Olympic silver medalist Sindhu chuan, "Hun rei tak hnua training nei pangngai leh chauh ni mah ila buaina ka nei lo, engkim mai kha a kaltluang leh nghal vek dawnin ka hria. Chawlh kar hnih chhung vel chuan ka dinhmun a ṭhat leh hman ka ring.

"Kuminah Olympic khelh tur a awm ta lo a, season tawp lamah erawh inelna a awm hman ngei ka beisei. Tun kum chhungin inkhel hman dawn lo mah ila tun aṭang hian season thar inbuatsaihna a ni nghal zel mai," a ti.

Training-na hmunah hian Sindhu bakah World Championship bronze medalist B Sai Praneeth pawh a inlan, harsatna dang a thleng leh a nih lem loh chuan chief national coach Pullela Gopichand hoin inbuatsaihna an nei chhunzawm zel ang.