Champions League-ah Man City hun a inher chhuak dawn?

Europe-a football inelna sang ber UEFA Champions League final chu June 10, Inrinni zan dar 12:30 hian Ataturk Olympic Stadium, Istanbul-ah khelh a ni dawn. Premier League champion Manchester City chuan Coppa Italia champion Inter Milan an hmachhawn ang.

Final-ah chuan eng pawh a thleng thei a, chutihrualin Italian club aiin Man City hi champion tura rinkai zawk an ni. Pep Guardiola hote hi tun hnaia thil thlen dan thlir pawhin champion turin an rinawm hle.

Thil thlen dan

Argentina-in FIFA World Cup an champion ṭum hnih kum 1978 leh 1986-ah khan Europe inelna sang berah champion thar an awm. Kuminah La Albiceleste hi World Cup-ah an champion a, UCL-a la champion ngai lo Man City-in final an lut chiah bawk.

Kum zabi 21-naah UCL-a champion team-in an first team squad-ah Brazilian emaw Spanish emaw an nei zel. Inter Milan-in an neih loh laiin City erawhin an nei ve ve.

Chelsea chunga Fulham an awm hnuhnun ber chu kum 1983 kha a ni a, khami kum khan UCL la champion ngai lo Hamburger SV chuan final-ah Italian club hnehin an champion. Man City-in Italian club an hmachhawn dawn.

Croatian player-in UCL nomawi an chawi loh hnuhnun berah English club an hneh lo a, final an vawi hnih hmachhawnna a ni bawk. Inter Milan midfielder Marcelo Brozovic-a'n Man City a hmachhawn dawn a, UCL final vawi hnih a khelhna tur a ni.

Tun season hmaa Pep Guardiola-a'n Bayern Munich a hmachhawn hnuhnun ber chu 2008/09 season kha a ni a, first leg-ah chiang taka chakin second leg-ah 1-1 in an inhnehtawk. Pep-a'n UCL a chawi zui. Kuminah City-in Bayern 3-0 in an hneh a, second leg-ah 1-1 in an inhnehtawk.

NBA Playoff-a LeBron James-a telna team 4-0 a an chak loh ṭum 2007 leh 2018-ah Bayern hnehtu team an champion. Tun season-ah LeBron-a telna team LA Lakers-in Denver Nuggets 4-0 in an hneh lo a, kuminah City-in Bayern an hneh leh chiah bawk.

City hmaa Premier League a zawna vawi thum champion hnuhnung ber Manchester United-in season thum chhungin UCL nomawi an chawi a, final leh semifinal vawi khat ve ve an chak lo bawk. City hian PL nomawi a zawnin vawi thum an chawi a, UCL final leh semifinal-ah an chak lo tawh bawk.

Premier League aṭanga Southampton relegate hnuhnung ber chu 2004/05 season kha a ni a, a tawpna ber niin vawi ruk chauh an chak. Khami ṭum khan English team-in UCL final-ah Italian club hnehin Istanbul-ah nomawi an chawi. Kuminah Saints an relegate a, English club-in Instanbul-a final-ah Italian club an hmachhawn dawn.

Serie A aṭanga Sampdoria relegate ṭum chu kum 2010/11 season kha a ni a, Pep Guardiola hoten UCL semifinal-ah Real Madrid hnehin an champion zui bawk. Kuminah Sampdoria an relegate a, Pep-a hoten semifinal-ah Real Madrid an hneh leh chiah bawk.