Inṭhuah fai tur Manchester United
Premier League-a sûlhnu nei ṭha ber Manchester United-in Dutch manager Erik Ten Hag hnuaia an season hmasa berah pathumna niin season an khar a, season tharah Champions League an khel dawn. Ten Hag-a hote hian League Cup nomawi an chawi a, FA Cup-ah final lut mahse an ṭhenawm Manchester City an hneh lo.
Ten Hag-a'n season thar atan team a din leh ṭan dawn a, Old Trafford chhuahsan tur player an awm nual ang. Chung zinga langsar chu Harry Maguire a ni a, Man United captain hi a chhuah tur chungchangah club thuneitute'n inremna an nei tawh nia sawi a ni.
Maguire hi khawvela defender man to ber ni mahse Man United tan sûlhnu ṭha a hnutchhiah lo a, fiamthu thawhna ang hialin a chhuak. Season hman zawh takah phei chuan Raphael Varane leh Lisandro Martínez te an awm avangin Maguire hian khelhna hmun a chang meuh lo.
January thla khan Maguire dawrtu club an awm a, Man United-in chhuah an phal lo. Euro 2024-ah Maguire hian England tan hmun pawimawh chan a duh avangin khelh tam a mamawh a, club thuneitute nen indawrna la kalpui dawn mahse a chàm rinawm tawh lo a, a khelh phakna tur club a zawm ang.
Man United-in January transfer-a an lak luh Wout Weghorst pawh a chhuah a rinawm. Dutch forward hian inkhelh tam a duh a, Ten Hag-a'n hmun pawimawh chantir a tum lo. Weghorst hi Everton bakah German leh Spanish club ten an duh a, United-in a manah euro maktaduai 10 bawr vel an beisei a, chutihrualin thutlukna erawh siam a la ni lo.
Loan hmanga Nottingham Forest zawmtu keeper Dean Henderson pawh Old Trafford-ah kir leh tawh mahse Forest-in a ngheta lak luh an duh. Man United leh Forest hi Henderson chungchangah an indawr mek a, English keeper hian Old Trafford a chhuahsan a rinawm.
Donny van de Beek pawhin chhuah tumin club a zawng mek nia sawi a awm bawk. Dutch midfielder De Beek hi inhliam vangin tun season-ah a inlan tam tawk lo a, Ajax aṭanga Old Trafford a pan hnuah hmun nghet a chang pha lo hrim hrim bawk. De Beek hian Man United tana khelh la duh mah se, inkhelh tam a duh avangin a club hmangaih hi a chhuahsan ang.
Season liam ta khan Eric Bailly chuan loan hmangin Marseille tan a khel a, Alex Telles pawhin loan hmang thoin Sevilla tan a khel. Ivorian defender Bailly leh Brazilian defender Telles te hian nipui bazarah a nghetin Man United an chhuahsan ang.