Djokovic hmaah Alcaraz a ding dawn e!

French Open 2023 champion tura rinkai Novak Djokovic leh Carlos Alacaraz te chu Zirtawpni zanah an intawng dawn. Dar 6:15-ah mipa semifinal hi khelh ṭan tur niin, an khelh zawh hunah match pakhat zawkin a zui leh ang.

Nizan khan Alexander Zverev leh Tomas Martin Etcheverry te bakah Holger Rune leh Casper Ruud ten quarterfinal an khel a, result kan hre hman lo - a chak zawk ve ve hi semifinal-ah an inhmachhawn zui leh dawn bawk a ni.

Number 1 a chak

Inelna neih ṭan a nih hma khan Carlos Alcaraz chanchinin sawi a hlawh, a theihna a san bakah Spanish star Rafael Nadal hmun ruak a luah thei mai ang em, tih chu mite hriat châk a ni, match a khelh tawh chinah chuan a la nghet ṭha hle.

Thawhlehni zan quarterfinal inkhelah Alcaraz hian Stefanos Tsitsipas chu 6-2, 6-1, 7-6(5) in a hneh, chak tur hian darkar hnih leh minute 12 bak hun a mamawh lo hial - Grand Slam final vawi hnih khel tawh lakah a chungnung hle a ni.

Court Philippe-Chatrier-ah Alcaraz hian mipui lawm a hlawh a, a hnampui Nadal hnung zuiin Roland Garros roreltu thar a nih theih an beisei. A hmabak erawh a awlsam dawn lo - Djokovic hneh tur chuan vanneih tel a ngai dawn.

Kum 20 mi Alcaraz chuan, "Novak Djokovic nena kan inkhel hi miin an en châk tih ka hria, inkhel hmuhnawm tak a nih theih nan ṭha taka ka khelh chhuah theih ngei ka beisei, a awlsam dawn lo hle tih pawh ka hre lawk sa chiang hle.

"Tun hma pawhin ka sawi ve tawh ṭhin, a ṭha ber nih kan duh a nih chuan a ṭha dangte kan hneh theih a ngai. Tunah chuan Novak Djokovic hi khawvel player ṭha berte zinga mi a ni a, a chunga awm ka duh a nih chuan ka hneh a ngai," a ti.

Player pahnih hi tun hmain vawi khat chiah an la intawng. Season hmasa Madrid Masters semifinal-ah an inhmachhawn a, set thum an khelh hnuin Alcaraz hi a chak, an inkhelhna hmun leh tuna an inkhelhna tur hi clay court ve ve a nih avangin inrintawkna chu a nei ang.

Hmabak Djokovic

Thawhlehni zan quarterfinal inkhel dangah Novak Djokovic chuan Karen Khachanov chu 4-6, 7-6(0), 6-2, 6-4 in a hneh a, hnehna chang tur hian darkar thum leh minute 38 hun a hmang thung a, harsatna lian tak erawh a tawk bik lo.

Kum 36 mi Djokovic hi a champion thei a nih chuan sulhnu ropui a ni dawn, Grand Slam champion hnem lamah Nadal (22 titles) nen record inṭawm an chelh lai chu a kalsan dawn a, hei bakah hian major tournament palia vawi thum champion tling vek thei awmchhun a ni ang.

Khachanov nen an intawn hma khan Djokovic hian French Open 2023-ah set a la hloh lo, Grand Slam bikah set 29 a la zawn thei. Mahse, Khachanov lakah set khatna a hloh a, set hnihnaah pawh tie break an khelh a ngai hial - a tawpah erawh player ṭha zawk a chak.

Serbian star Djokovic chuan, "Set hnihna tie break kha duhthusama ṭhain ka khel, khata ṭang khan match bul ka ṭan thar leh ni maiah ka ngai. Grand Slam quarterfinal a nih tawh chuan hetianga inkhel hautak hi chu a thleng tur pawh a ni," a ti.

Roland Garros bikah Djokovic hian match 90 hnehna a chang tling ta chiah a, ṭum 16 chu a chak lo zawkah a ṭang tawh bawk. A kum leh hriselna dinhmun chhutin kumin hi a hun ṭha hnuhnung a ni ve thei tawh a, chuvangin a ṭha thei ang bera a hmawr bawk a duh ang.

Player chhuak thar an awm ve zel, a bik takin semifinal-a a hmachhawn tur Alcaraz hi a ranking thlenga rawn nek buai phak a ni. Chuvangin, Djokovic hian major title lak hnem lama a chungnung ber nih a duh chuan Spanish rawlthar hi a ngam ngei a ngai dawn.