Power lakah Luangmual an chungnung

Tata SK Pro Volleyball League hmeichhe inelna lamah, kai thar Luangmualin result ṭha an nei nghal. Thawhlehni zan khan Luangmual hian Power Department Sporting Club chu 25-19, 25-16, 20-25, 25-15 (3-1) in an hneh.

R. Dengṭhuama Indoor Stadium, Mualpuiah Nipa Barad-i leh Lalmuanpuii te an che na hle. Ahmedabad tleirawl Nipa-i chuan Mizorama a inkhelh hmasak berah point 31 vaw chhuakin 19 a hloh a, D3 Business Player of the Match lawmman a dawng.

A kawppui, Kolasib nula Muani'n point 21 hmuin 11 a paih ve thung a; Power tan mi mala thawh hlawk ber Vanlalremruati'n point riat hmuin point thum a hloh thung, tho chhuak turin thlawptu a nei ṭha tawk lo.

Luangmualin 2019 Pro Volleyball player ṭha bera thlan Muani an kawl bakah, team tichak zual turin Gujarat tana National Beach Volleyball silver leh Youth National Games Volleyball gold medal awrh tawh Nipa an la lut a, team lian dangte elphak an ni tih a takin a lang nghal.