Saudi thawm a lian zel - Karim Benzema an la lut ta!

Season tharah Saudi Pro League lam kan ngaihven viau a nih pawhin a awm lo hran lo ang - Cristiano Ronaldo hnua star lian, Saudi club zawm leh hmasa ber ni turin Karim Benzema chuan Al-Ittihad a zawm.

Kum thum liam ta vel khan Ballon d'Or kawl mektuin Saudi football lam a pan tur thu hi sawi ila, mi tam zawkin an awih lo ang - mahse, a tak ram a thleng a, sum tamna Saudi Arabia lamin European football an run mek e!

Benzema chuan, "Ka career-a hlawhtlinna ropui tak tak chang turin ka vannei hle. Spain leh Europe-ah ka tih theih ang chu ka ti vek tawh a, chona thar hmachhawn a hun ve tain ka hria a ni," a ti a, Saudi a pan chhan a sawi.

Kum 35 mi Benzema hian Real tan kum 14 zet khelin nomawi 25 ngawt a chawi a, heng zingah hian Champions League panga leh La Liga nomawi pali a tel - Saudi lam pan tur hian kum khat contract a la neih chu an titawp a ni.

A hlu ber sum

French striker Benzema hian Saudi Arabian champions Al-Ittihad-ah hian kum thum chhung atan contract a ziak a, a hlawh zat tur tak hi puan zar ni lo mah se khawthlang media tam zawk chuan season khatah euro maktaduai 200 a hlawh dawn niin an sawi hem mai!

Benzema chuan, "Saudi Pro League hi league ṭha tak a ni a, player ṭha tak tak an awm nual bawk. Ka ṭhian ṭha tak Cristiano Ronaldo a awm sa a, ani hian Saudi football ṭhanzia a pholang tawh.

"He hmunah hian Europe-a ka tih ang thoa hnehna chang tura lokal ka ni," a ti a, a hlawh tam ringawt chu middle-east club a zawm chhan ni loin a sawi - awih erawh a harsa ang reng!

Benzema hian Real tan goal 354 ngawt a khung hman a, Spanish club tana goal khung hnem lamah goal 450 khungtu Cristiano Ronaldo chiah a tluk lo - Al-Ittihad hi Wolves leh Tottenham boss hlui Nuno Espirito Santo chuan a enkawl mek.

An hrang lua e

European football-a player langsar tak takten Saudi lam an hawi chhunzawm reng a, Al-Ittihad hian Chelsea midfielder N'Golo Kante chu lakluh tumin an dawr mek bawk a, he thuziak i chhiar meuh chuan an inlalut fel tawh hial mai thei.

Khawthlang media-ten an tarlan dan chuan Kante hian Saudi club-ah hian kum hnih chhung atan contract a ziak dawn a, season khatah €100mtd a hlawh dawn - Kante hian Chelsea-a a contract neih lai chu a hmang zo tawh dawn hrim hrim a ni.

Al-Ittihad hian Paris Saint-Germain aṭanga chhuak hlim Sergio Ramos pawh an dawr nia sawi a ni a, Manchester City-a contract zo tur Ilkay Gundogan, Juventus chhuahsantu Ángel Di María, Barcelona captain hlui Sergio Busquets, Real midfielder Luka Modric leh Spurs chhuanvawr Son Heung-min te pawh Saudi lama pem tura sawi zingah an tel.

Alexis Sánchez chu Al Fateh nen sawizawm a ni a, Al Nassr chuan Ronaldo khelhpui turin Wilfried Zaha an be mek bawk - Crystal Palace forward hi kum khata £15mtd hlawhtir an inhuam. Pierre-Emerick Aubameyang pawh Al Ahli leh Al Shabab nen sawizawm a ni a, Sevilla keeper Yassine Bounou pawh chhuak tura sawi a ni.

Messi chanchin

Tun dinhmuna Saudi nena sawizawm langsar ber chu Lionel Messi a ni a, Argentine forward hi Al-Hilal chuan lakluh an duh - Ronaldo leh Messi hi league khatah an khel dun leh a nih ngat chuan khawvelin loh theih lohin Saudi lam a hawi a ṭul ang.

Messi hi tun hnaiah Barcelona-a kir tur anga sawi thawm a ri thar leh a, hetihlai hian Al-Hilal chuan season khata €500mtd hlawh turin an lo sawm ve reng bawk. Messi hian an hming tarlan loh, European club lian tak pahnih aṭanga sawmna a hmuh thu sawi a ni bawk a, tun dinhmuna a pan chance sang ber erawh Inter Miami a ni.

Major League Soccer club hian Saudi lam angin sum ngah lo mah se a league pumpui hi Messi lalut turin an ṭang niin an sawi. MLS thawhpui Apple leh Adidas te chuan Messi hian Miami a zawm a nih chuan MLS aṭanga hlawkna an hmuh aṭangin share pek an phal!

Apple TV+ ah MLS hi chhuah ṭhin a ni a, MLS Season Pass kaltlanga subscriber thar an neih aṭangin Apple hian Messi hi share pek an phal. Messi nena thawkdun sa Adidas pawhin MSL kaltlanga hlawkna an hmuh chu Messi hnenah hian share pek an phal - a pawimawh ber erawh Inter Miami a pan phawt a ni.

Saudi hmachhawp

Middle-east ram hausa Saudi Arabia hian Saudi Vision 2030 chu an kalpui mek a, an ram hmasawnna tur kawng hrang hrangin an duang - chung zingah chuan football a tel a, World Cup 2030 thlen tumin Egypt leh Greece te nen Saudi hi an thawk ho.

Thawhṭanni khan Saudi Public Investment Fund chuan an ram club lian pali Al Nassr, Al Ittihad, Al Ahli leh Al Hilal-ah te share 75% ṭheuh an lei a, football-a star langsar ber ber hip khawm chunga Saudi football tihlar an tum.

Saudi PIF hi Premier League club Newcastle United-a 80% share nei lai an ni a, club lei hi 'privatization project' an kalpui laia public sector organization-ten infiamna hmasawn nana sum an sen zel theih nana hmalakna chi khat a ni.

Ruahman dan chuan Saudi Pro League hi kum 2030-ah chuan kum khata dollar maktaduai 480 tal lalut tawh tura beisei a ni a, he an ruahmanna a hlawhtlin theih nan chuan star lar tak tak league-in a kawl phawt a ngai - hmalam an pan zel e.