Liverpool zawm tur Mac Allister

Brighton & Hove Albion midfielder Alexis Mac Allister chuan Liverpool a zawm dawn a, he thuziak i chhiar meuh chuan Argentina international hian Merseyside club hi a zawm tawh hial mai thei.

Liverpool chuan Mac Allister-a manah hian pound maktaduai 55 an pe dawn a, nimin lam khan Brighton hian an player hi Liverpool-a medical neih phalna an pe tawh a ni.

Kum 24 mi playmaker hian season hman zawh takah khan Brighton chu Premier League-ah parukna nihpuiin, season tharah Europa League an khel dawn a, December khan Argentina chu World Cup-ah a champion pui bawk.

Mac Allister hian season hman zawh takah khan Brighton tan inelna hrang hrangah match 40 khelin goal 12 a khung a, assist vawi thum nei bawkin, match tam zawk chu number 10 angin a khel a, tlarhnung pui turin a rintlak ṭhin viau bawk.

Liverpool hi rei tak chu Borussia Dortmund rawlthar duhawm Jude Bellingham nen sawizawm an ni a, mahse, English midfielder la chhuak tura pound maktaduai 100 tal insen huam a ngaih avangin an inhnukdawk a, Mac Allister lam hi an hawi ta zawk a ni.

Brighton manager Roberto de Zerbi chuan thla hmasa lawk khan Mac Allister chu player ṭha tak a nih thu leh, level sang zawka khelh a phu thu a sawi a, tunah chuan Jurgen Klopp-a enkawlna hnuaiah a khel dawn ta.

Mac Allister hian January 2019 khan Argentinos Juniors aṭangin Brighton hi a zawm a, a club hluiah hian loan-a kirtir niin, March 2020 khan English club tana a match hmasa ber a khel a, match 112 khelhsaka goal 20 khungin, assist vawi kua a nei.

Argentina tan vawi 16 inlan tawhin, World Cup 2022-ah khan match ruk inlanin, group stage-a 2-0 a Portugal an hnehna inkhelah goal khungin, world champion an nih theih nana player pawimawh zingah a tel.