Brazil-in Ancelotti an la duh reng

Football khawvela ram langsar ni reng ṭhin Brazilian Football Confederation (CBF) president Ednaldo Rodrigues chuan Carlo Ancelotti lakluh an la duh reng thu a sawi a, Rodrigues chuan, "Kan plan A-ah a la tel reng a ni," a ti.

Real Madrid boss Ancelotti hian season hman zawh takah khan Real chu La Liga-ah pahnihna nihpuiin, Champions League-ah an nomawi an humhim thei lo bawk a, season hman zawh takah khan Copa del Rey chu champion nomawi an chawi awmchhun a ni.

Santiago Bernabeu-a kum khat dang cham tura contract la nei mek Ancelotti hian Real a chhuahsan loh tur thu a lo sawi fo tawh a, mahse, CBF president Ednaldo Rodrigues -a ṭawngkam aṭang chuan a chhuahna chance a sang hle.

Brazil hian June 17 khian Guinea chu Spain-ah friendly match khelhpuiin, June 20 khian Senegal chu Portugal-ah an inkhelhpui dawn bawk. Rodrigues chuan he hun hi Real Madrid president Florentino Perez kawmna hun remchangah a hman tur thu a sawi.

Rodrigues chuan, "Ancelotti hi kan duhthlan number 1 a la ni reng a, Europe-a kan zin hunah thil tam tak kan tichiang thei ang. Tuna kan zin tur hi kan tan chuan a pawimawh hle.

"Ancelotti leh Real Madrid President biak kan tum a, kan inbiak zawhah Italian coach hi kan lakluh dawn leh dawn loh chu a chiang thei ang chu," a ti a, coach hlawhtling Ancelotti chu Brazil enkawl tura hmin a tum.

CBF president Ednaldo Rodrigues chuan Ancelotti lalut turin sum chu buaina a nih loh thu sawiin, "Sum hi tunah chuan buaina a ni lo. Tuna buaina ni mek chu a contract neih lai hi a ni a, tuman bawhchhiat an duh lo. Mahse, ani lalut tur hian kan theihna zawng zawng kan hlan dawn a, a tak ram chantir kan tum a ni," a ti.

Brazil hian World Cup 2022-ah khan quarterfinal an thleng a, coach Tite-a'n a chhuahsan hnuah coach dang an la nei rih lo - Ancelotti hian season thar ṭan hmain international football lamah min insawn san mai ang em, tih chu zawhna awm mek a ni.

Hetihlai hian Real Madrid player hlui pahnih Ronaldo leh Kaka te chuan player an nih laia lo enkawl tawhtu coach hi Brazil boss a nih theih nan hma an la, nia sawi a ni.

Player chawl tawh pahnih hi Ancelotti-a'n AC Milan a enkawl laiin Italian club-ah an khel ve ve a, CBF aiawhin Italian coach hi an be tawh nia sawi a awm.

Brazilian striker ropui Ronaldo hian inkhelh a chawlhsan hnuah pawh football a la buaipui hle - La Liga club Real Valladolid leh Brazilian team Cruzeiro neitu a ni a, Real-in Palmeiras rawlthar duhawm Endrick contract an ziahpui theih nan khan a thawhhlawk hle.

Hetihlai hian Kaka hi Brazil sporting director ni thei dinhmunah a ding mek a, Middlesbrough midfielder hlui Juninho Paulista chu Sporting Director ni ṭhin, World Cup zawh khan a bang a, Kaka hian a thlak rin a ni.