Red Bull nen kan inkar a zau - Hamilton

Lewis Hamilton chuan Red Bull an elphak rih lo tih a pawm a, tun season mai ni loin season thar atan pawh ruahmanna ṭha tak an lo siam reng tawh mai thei niin a sawi hial - car intlansiak bakah rilru lam inbeihna a thleng chho dawn.

Tun season Formula 1 intlansiak an neih tawh zawng zawngah Red Bull an la chak fai vek, team dang tan kawng an la kian miah lo tihna a ni. A bik takin champion lai Max Verstappen a kal filawr hle.

Intlansiak hnuhnung ber Spanish Grand Prix-ah pawh Verstappen hi a chak ber a, a hnungah Hamilton a thleng - driver pahnih inkarah hian second 24 a awm. Mercedes hian hnehna la chang ve chiah lo mah se an tan chuan hmasawnna lawmawm tak a tling.

Britain tlangval Hamilton chuan, "Kawng hrang hrangin kan danglam a, tun hun an thlen theih nan hian hun rei tawh tak aṭangin hma an lo la tawh. Season thar atan pawh eng emaw ruahmanna chu an nei leh tawh hialin ka ring a ni.

"Keini pawhin an tih ang hi kan ti thei, tun anga hma kan sawn zel a nih chuan kumin tawp lamah chuan team ṭha berte kan elphak ve tawhin ka ring," a ti a, a rilru tak tak a sawi nge an elpui team a chhaih mai mai tih erawh hriat a ni tawh lo.

Hamilton hian F1 nomawi hi vawi sarih a chawi tawh a, champion hnem lamah Michael Schumacher nen an intluktawk mek. Record thar siam thei dinhmuna a din laiin Verstappen a rawng lang - Dutch tlangval hian tun hnai season hnuhnung pahnih chu F1 title a la a ni.