Milan leh Maldini an inṭhen

Player a nih laiin AC Milan captain a ni thei a, inkhelh a chawlhsan hnuah technical director a ni leh bawk - mahse tun hnaiah result an neih ṭhat tawk loh avangin Milan leh Paolo Maldini an inṭhen.

Inkhelh a chawlhsan hnuah Maldini hian technical director hna hi kum nga a thawk hman, 2022 khan Serie A nomawi chawi puiin an champion theih nan a thawhhlawk hle a, kum 11 hnua an hlawhtlin lehna hmasa ber a ni hial.

Tun season an hman zawh takah Milan hi Serie A-ah palina an ni phak hram a, Champions League semifinal thleng mah se an elpui Inter Milan an ngam lo. Season tharah hmel thar nen chona hmachhawn an tum a ni.

Milan chuan thuchhuah siamin, "Paolo Maldini chungah kan lawm, hun rei tak hnuah Scudetto min lakpui a, hei mai bakah hian European football inelna sang ber Champions League-ah kan kir leh phah bawk," an ti.

Technical director a nih hun chhungin Maldini hian player hrang hrang a lalut, chung zingah chuan Rafael Leao, Theo Hernandez, Fikayo Tomori leh Olivier Giroud te chu a langsar zual leh an hlawhtlin theih chhan an ni.

Player a nih lai chuan Maldini hian Milan tan match 901 a khel a, nomawi 26 ngawt a chawipui - heng zingah hian Serie A nomawi pasarih leh European Cup/Champions League title panga a tel.

Maldini-a pa Cesare pawh Milan tana vawi 467 inlan phak a ni a, tunah hian Paolo-a fapa Daniel Maldini pawh Milan player a ni mek a, mahse intuaihriam turin Spezia lamah loan hmangin a chhuak.