Semifinal-ah Sabalenka a lut

Aryna Sabalenka chuan a vawi khat nan Grand Slam semifinal a lut. Thawhlehni zan quarterfinal inkhelah Sabalenka hian a khingpui Elina Svitolina chu 6-4, 6-4 a hnehin a thiam zual pali zingah a inhlangkai a ni.

Inkhel aiin match zawh hnua an chet danin sawi zui a hlawh zawk. Sabalenka hi Belarus mi a ni a, a hneh tak Svitolina hi Ukraine mi a ni thung. Ram pahnih hi buaina nei lai an ni - Belarus hi Russia lamṭang an ni mek.

Svitolina chuan inkhelh banah a khingpui hi a chibai duh lo. A hmuna inkhel entute chuan Svitolina hi a chet dan avangin an auel a, an 'Boo' khum a ni. French mipuite hian pawn lam buaina chu infiamna huanga lakluh an duh lo.

Ukraine nula Svitolina chuan, "Inkhelh hma khan in chibai ka duh loh thu chiang takin ka sawi lawk tawh a, chumi hnuah inchibai tura min nghak kha mak ka ti," a ti a, inkhel entu lamin an tih dan chu a beisei lawk thil a nih thu a sawi bawk.

Hnehna changtu Aryna Sabalenka chuan, "Engtik lai mahin Indo hi ka thlawp ngai lo a, ka thlawp ngai bawk lo ang. Chutihrual chuan Belarus mi ka ni a, ka ni kumkhua tawh bawk ang," tiin an ram phatsan a tum lo.