Angel Di Maria-a'n Juventus a chhuahsan

Argentine forward Angel Di Maria chuan Juventus tan season khat a khelh hnuah Serie A club a chhuahsan thu a tichiang a, season ṭan dawna kum khat chhung atana a zawm team-ah a contract a pawtsei dawn lo.

Kum 35 mi Di Maria chuan, "Hun harsa leh khirhkhan tak chu a tawp ta. Club-in nomawi a chawi theih nan ka theihna zawng zawng ka hlan a ni, tih hre chungin ka chhuak dawn a, mahse, hlawhtlinna erawh kan chang ta lo.

"Nomawi ka chawi loh avanga hrehawm ti tak chungin Juve hi ka chhuahsan a, mahse, dressing room-ah ṭhian thar duhawm tak tak ka chhar avangin hlim takin ka chhuahsan dawn. A tir aṭanga min thlawptu ka khelhpuite chungah lawmthu ka sawi a, mahni ina awm ang mai ka ni," a ti.

Di Maria chuan sawi zawmin, "Ni tin hmangaih taka min enkawl avangin Juventus chhungkua zawng zawng chungah lawmthu ka sawi a, ka thinlungah hian in cham reng tawh ang," a ti a, Juventus a thlah.

Argentina international Di Maria hian Juventus tana a match hmasa berah goal khungin assist a nei bawk a, mahse, hliamin a tihbuai avangin team tana a ṭangkai tur angin a ṭangkai tawk thei lo.

Heti chung hian Di Maria hian Juve tan match 40 a khel a, goal riat khungin, assist vawi sarih a nei bawk.