Ka tana match pawimawh ber a ni - Inzaghi

Inter Milan coach Simone Inzaghi chuan Manchester City nena Champions League final an khelh tur chu a ngaipawimawh hle a, team enkawl hna a thawh chinah chuan atana match pawimawh ber a nih thu a sawi.

Kum 47 mi Inzaghi hian season bul a ṭan fuh tawk lo a, club thuneitu lamin ban an tum hman hial. Amah thlaktute pawh an melh a, mahse thutlukna an siam fel hmain team a siamrem leh hman.

Serie A lamah champion lo mah se Coppa Italia nomawi an chawi a, tunah chuan European football inelna sang ber Champions League nomawi chawi thei dinhmunah an ding leh ta mek - match khat chak an la hmabak.

Inzaghi chuan, "Season rei leh hautak tak a ni a, ka tan chuan a rei zual bik hle pawhin a hriat. Mahse, coach ka nih hnua ka match pawimawh ber tur kan khel dawn a ni a, rilru fim taka awm a ngai," a ti.

Antonio Conte thlaktu Inzaghi hian a ṭha thei ang bera season khar a duh. Chutihrualin an khingpui tur Man City hi Premier League leh FA Cup champion kawp thei an ni - Pep Guardiola leh a naute hneh hi thil awlsam a ni lo ang.