Football thiam venga chhiar tawh tur Tlangnuam

Bawngkawn hmaah Tlangnuam an lám leh thei ang em, tih zawhna chu chhanin a awm a, RG Stadium-ah kawr var nen an lám. LBS Suzuki 21st Inter Branch YMA Football Tournament-ah Tlangnuamin mellung thar an phun a, team ṭha Armed Veng leh Durtlang hneh tawhtu hian player nei ṭha bera chhàl Bawngkawn chu 3-2 in an hneh. Final hi June 9, Zirtawpni zana khelh tur a ni a, Tlangnuamin nizana inkhela Salem Veng hnehtu Venghnuai an hmachhawn ang.

Nimin tlai inkhelah Tlangnuamin PC Lalchhan-chhuaha hmangin an khung hmasa a, Bawngkawnin F. Lalremtluanga leh MC Malsawmzuala te hmangin first half-ah an lehthal. Second half-ah thil mak a thleng a, 'Giant Killer' Tlangnuamin CVL Remtluanga leh Zothanpuia te hmangin an chhang let a, 3-2 in hnehna an chang.

Mizo thuziak thiam hmingthang, Tlangnuam fa chuam Mafaa Hauhnar la dam se, an zin kawng hi ngaihnawm zawkin a ziak thiam ang. Tun dinhmunah erawh Tlangnuam boruak nawm dan tur hi thua sawifiah theih a ni lo.

Bawngkawn an thiam
Champion tura rinkai zinga rin hlawh lawr lak Bawngkawnin inkhelh ṭan phat aṭangin inkhel an thunun a, Tlangnuam aiin ṭha zawk mahse goal chance an insiam thei bik lo. Mala hote hian Zonunmawia, Lalromawia leh Tluangtea te hmangin ball inpe kual nalh viau mahse an player chhuanvawr Isak Vanlalruatfela chu PC Lalchhanchhuaha'n a veng ṭha ve tlat.

Tlangnuam pawhin goal chance an nei thei bik lo a, mahse, minute 29-naah right back Chhana cross ball chu goal-ah a lut - Bawngkawn keeper Aijalon Lalliantluanga'n ball kal dan a chhût sual.

Goal luh hnuah Bawngkawn an buai phah lo a, an goal bawh a na sawt. Minute 36-naah Zonunmawia corner pet chu vengtu nei lo MC Malsawmzuala'n goal-ah a tauh a, keeper Lalbiakkima'n a tihper avangin Tluangtea'n siphurh sutna goal a khung.

Tlangnuam an chesual zui a, captain Jones Lalṭhakima khelh loh avanga captain hna chelhtu R. Lalmuanpuia'n Bawngkawn striker MC Malsawmzuala a pass. MPL best forward MC-a hian a thilthlawn pek dawn chu minute 41-naah goal kilah mawi takin a khung.

Beiseina nun neitu
Bawngkawnin goal engzat nge an khung belh ang tih an thlir ṭhup a, mahse Tlangnuamin beiseina nei chungin khelmual an rawn lut. Coach tawnhriat nei ṭha Mala'n thutlukna pawimawh a siam a, minute 49-naah keeper chesual Aijalon aiah second keeper Dylan C. Zoramsangliana a luhtir. A tawpah erawh hei hi Bawngkawn chak lohna chhana ngaih theih a ni ta hial.

Minute 65-naah Tlang-nuamin corner kick an hmu a, CVL Remtluanga'n goal-ah a pet tlang - Bawngkawn keeper Dylan-a tawlh thluk avangin goal-ah a lut. Tlangnuamin ṭantu an ngah siphurh an sut avangin an phur thar hle.

Bawngkawn an chesual nawn a, minute 70-naah freekick an chawi. Zothanpuia rawn pen chhuakin a ball pet chu goal zawna kal satliah angin ngaih theih mah se goal veng tura dah keeper Dylan-a'n a hui lut a, Tlangnuamin 3-2 in hma an hruai ta zawk.

Team ṭha zawk Bawngkawnin na takin an nawr let a, an vanneih ṭum a ni lo. MC Malsawmzuala hmangin siphurh sutah inngai mah se assistant referee-in offside flag an phar a, goal-ah pawm a ni lo. Replay aṭanga a lan danin offside a ni lo a, VAR hman a nih miau si loh avangin Bawngkawn ṭahna belhchhahtu a ni ta zawk.

Hun tawp dawn thlengin Bawngkawnin an nawr na a, Armed Veng leh Durtlang laka chhanhim tawhtu keeper Biakkima a chet ṭhat tlat avangin goal a lut tawh lo. Bawngkawn an tla a, Tlangnuamin an veng history-a a vawi khat nan Mizoram pum huap football inelnaah final an lut a ni.