Salem Veng chunga awm Venghnuai
Aizawl South Derby-ah Venghnuai an dingchang a, an veng chanchina a vawi khat nan CYMA Football-ah final an lut. LBS Suzuki 21st Inter Branch YMA Football Tournament semifinal-ah nimin tlai khan Venghnuaiin an veng aṭanga indang Salem Veng chu 1-0 in an hneh a, goal awmchhun hi Eric Remruatpuia Chhangte khung a ni.
Venghnuai hian final an lut a ni ringawt lo a, final lut tur hian an ṭhenawm Salem Veng an hneh. An hun tawn nawm dan tur hi Venghnuai pa chauhin a hrefiah thiam ang.
Boruak a nung
Venghnuai leh Salem Vengah chuan CYMA Football bak sawi tur an hre lo a ni ber a, inkhelhna hmun RG Stadium hi Salem Veng huam chhunga awm a nih bawk avangin a hmun ngeia Aizawl South Derby thlir chu veng pahnih mipui ṭhahnem zawk tum a ni.
Amaherawhchu thil tuma 'Kristian nun dan ṭha ngaihsan' neitu Central YMA berin inkhawm zanah inkhel pawimawh a buatsaih a, inkhawm thlengin nghawng a nei niin a hriat. Semifinal khel veng pahnih huam chhunga kohhran hrang hrangte ṭum dang zawng aiin an bang hmaah a ngai theih a, CYMA Football nena sawizawm loh theih a ni lo.
Rinlawk ang ngeiin RG Stadium-ah entu an ṭhahnem a, ṭan hma hauhin khelmual pawn boruak a nung. Inkhel chhung pawh pawn boruak ang thoin ṭan phat aṭangin a nung nghal.
Venghnuai hun
Salem Veng hi Venghnuai pa Lalrindika Hmar enkawl a ni a, Venghnuai hi Rindika hnuaia inzir ṭhin K. Lalthlamuana kaihhruai a ni thung. Player neih dan thlir mai chuan Salem Veng an puitling zawk a, semifinal boruak sang pawh ngam tur zawka ngaih an ni.
Mahse, beisei ang ngawt a ni lo - first half-a team ṭha zawk chu Venghnuai an ni tlat. Venghnuai tan AIFF Elite Academy aṭanga inzir chhuak Eric Remruatpuia Chhangte freekick chu a hlauhawm nghal a, Salem Veng pawhin Lalbiakdika hmangin Venghnuai tlarhnung an rum ṭhaih ve bawk.
Venghnuai captain Laldanmawia tlarhnungah a che ṭha a, Salem Veng tlarhmaten an su nghing lo a ni ber. Salem Veng erawh tlarhnung aṭanga ball pass chhuah an tumna lamah an chesual, Venghnuai forward C. Nuna'n pressure a pek ṭhat avangin Salem Veng keeper RVL Lalnunmawia'n (Buanga) a tlawh chhuak sual. Ball per chhuak Eric-a zawnah tak a kal a, Venghnuai midfielder hian chiang zetin a pet goal - ball pet thiam player tan lo chuan hlah theihna tak tur a la ni.
First half-ah Venghnuai an che ṭha zawk a, Salem Vengin darkar chanve chhoah player an thlak hial. Vanneih ṭum ni se Venghnuai hian goal dang pawh khung belh thei an ni. Hun tawp hma hretin ball pet thiam TS Zadeng chuan hla tak aṭangin crossbar a pet per a, Salem Veng an him hram.
Goal venhim hna
Rindika Hmar-in halftime-ah a naute a fuih ṭha a, second half-ah Salem Veng an hmuhnawm sawt. Ṭan aṭanga minute sarihna lekah Venghnuai midfielder Joshua Malsawmkima chuan David Lalchhuanawma a titlu a, Salem Vengin penalty an beisei laiin referee-in freekick a pe. David-a'n freekick hi pet nghalin keeper Ramchhana'n harsatna nei loin a man chat.
Salem Veng goal bawh a na zel a, mual vei lam aṭanga cross chu BD-a'n goal zawna tauh loin David-a pek a tum a, a na hret. Hemi hnu hian Remruata'n freekick a pet a, keeper Ramchhana'n hming chher nan a hmang.
Venghnuaiin goal venhim hna an thawk a, Salem Vengin siphurh sut an tum viau bawk. Salem Vengin freekick leh corner kick te an hmu ṭhin a, an hmang ṭangkai thei lo.
Captain Danmawia kaihhruaina hnuaiah Venghnuai tlarhnung a phui ṭha a, keeper Ramchhana'n a hna a tlin bawk. Minute ruk hun pek belh a awm chungin Salem Vengin chance ṭha an insiam thei lo. Venghnuaiin Salem Veng lakah goal an venghim a, 1-0 in hnehna an chang.
Coach K. Lalthlamuana tan hun duhawm a ni a, FC Venghnuaia amah kaihruai ṭhintu Rindika Hmar kaihhruai Salem Veng a hneh. Venghnuaiin final-ah 'Giant Killer' tia sawi Tlangnuam an hmachhawn dawn a, final-ah Aizawl South team pahnih an inhmachhawn ang.