Barcelona tan thawhlehna hun ṭha?

Champions League last 16 second leg-ah Barcelona chuan zanin dar 12:30 hian Napoli an mikhual dawn a, sawisel tawk nasa Barca tan zanin hi an hmingchhe zawng zawng thaibona remchang a ni - first leg-ah 1-1 in an inhnehtawk. 

Barca hi an talbuai takzet - La Liga hmahruaitu nichungin coach Ernesto Valverde an ban a, table-ah hma hruai ringawt mah se kum 56 mi coach hnuaia Barca khelh dan enin an ban hi thil awm tak a ni. 

Mahse, Valverde an ban hnua an lakluh Quique Setien-a hnuaiah hma an sawn lo mai a ni lo, table chung ber aṭangin petchhuah an ni a, an hmelma Real Madrid chu La Liga champion an ni ta daih!

Setien hian zaninah Napoli laka hnehna a chang a nih loh chuan a kalna tur a hria - kawngka zau taka hawn a ni ang a, Nou Camp aṭangin petchhuah a ni ang. Spanish coach hian chu chu thlentir a duh dawn lo. 

Barcelona-in league nomawi an hloh khan a lungawi lo langsar ber chu Lionel Messi a ni a, tun thlenga Barca tana contract thar la ziak duh rih lo forward hian insumna nei miah loin a lungawi lohna media hmaah a bun ruak. 

Messi hian, "La Liga tana kan ṭha tawk lo a nih chuan engtin nge Champions League tan kan ṭhat tawk theih ang?" tiin zawhna a zawt a, an team khelh danah a lawm lo takzet tih hai rual a ni lo. 

Argentine forward hian a duh tawk mai lo. AS Roma leh Liverpool laka an lo mualpho tawh dan thlirkirin, "Roma, Liverpool... kan fan-te hian an dawhtheihna an hloh zo tawh a, a chhan chu engmah kan pek loh vang a ni," a ti!

Hmeichhe ang tui laklawh ang maiin Messi-a ang a, an thiampuipa leh innghahna ber thinrim hian eng ang takin nge Barca-ah nghawng a neih chu zaninah kan hre dawn - en a châkawm ta. 

Catalan club-in zanin inkhel turah hrem vangin Sergio Busquets leh Arturo Vidal an chhawr thei dawn lo a, mahse Dutch midfielder duhawm Frenkie de Jong a dam tawh avangin an ngaih a ngam dawn.  

Setien-a tan hman theih turin Ousmane Dembele leh Antoine Griezmann an awm dawn bawk a, Dembele erawh a chhawr nghal a rinawm loh - tlarhmaah Griezmann hi Messi leh Luis Suarez nen an inkawp a nih chuan Napoli tan fimkhur a finthlak ang.

Barca midfielder Frenkie de Jong chuan, "First leg kha a harsa takzet a, kan game ṭha ber kan khel lo tih a chiang. Mahse, tunah erawh kan beisei ang ngei result hlawhchhuah theih kan beisei a ni," a ti a, a inrintawk thu a sawi. 

Hriat tel tur chu Barcelona hian an muala Champions League match an khelh hnuhnung 35-ah tlawm an nei miah lo a, Italian club an mikhual hnuhnung 15-ah an tlawm miah lo bawk - Barcelona lamah thawnthu hlui a ṭang a, Napoli-in a thar leh ngaihnawm zawk ziah an tum ang. 

Barcelona-in an hriat tel tur chu Napoli hi player a nih lai pawha rorum Gennaro Gattuso hnuaiah an khel tih hi a ni a, player a nih laia a mizia a la thlak loh avangin Italian coach hian khelmual sir aṭangin a naute pa takin a la kaihruai reng. 

Gattuso chuan, "Barcelona team pumpui hi an theihna a sang em em a, game danglam tak a ni. Goal khung leh khung loh ngaihtuah a ngai lo a, a pawimawh ber chu team kan nihna anga khelh a ni a, chance kan nei thei tih kan hre tur a ni," a ti. 

Napoli hian Serie A lamah pasarihna dinhmun chauh hauh mah se Coppa Italia nomawi an chawi thung a, coach Gattuso hnuaiah hian December aṭang khan an khel ṭan ve chauh tih hriat tel a ṭha bawk. 

Kum 42 mi coach chuan, "Ka ngaihtuahna zawng zawng chu Barcelona-ah a awm tawh. Level sang taka inkhel tur kan ni a, he hmuna awm hi kan phu tih pholan kan duh. Barcelona hneh tur chuan risk lak pawh a ngai a ni," a ti a, huaisen taka khelh a tum. 

Napoli hian Barca-an hmachhawn hmaa an match hnuhnung bera Lazio 3-1 a an hneh ṭumin Lorenzo Insigne chu hliam vangin an chan a, nimin khan training a zawm leh tawh avangin bench-ah tal erawh a ṭhut a rinawm. 

Italian club hian Insigne chhawr thei lo pawh ni se tun season-a goal 16 khung tawh Dries Mertens, goal 14 khung tawh Arkadiusz Milik leh player thiam bik Jose Callejon leh Hirving Lozano-te an la kawl tho avangin lungphanna tur a awm lo. 

Napoli tana thu lawmawm ber tih ngam chu European club lian te awh rawn defender Kalidou Koulibaly a dam tawh hi a ni a, paltlang a hautak dawn. Hriat tel tur chu Napoli ṭhatna hi tlarhnungah a innghat tel. Coppa Italia nomawi an chawina kawngah he team hian goal khat chauh an chhuah a, Messi leh a ṭhiante tan zuam sual an awl ang - midfield-a Piotr Zielinski che vel tur hi hmuh a châkawm tawh 

takzet bawk.