India an chak lo nawn

New Zealand-in Inrinni khan India run 22 in an hneh a, ODI series match thum khelh tura a hmasa pahnihah hnehna an chan avangin series an la dawn tih a chiang. ODI match hnuhnung ber hi February 11, Thawhlehni zing dar 7:30 hian Bay Oval, Mount Maunganui-ah khelh a ni ang.

Eden Park, Auckland-ah Inrinni khan ODI match hnihna khelh a ni a, ṭhumvawra vannei India-in vawm hmasak an thlang. New Zealand-in over 50-ah run 273/8 an siam a, Martin Guptill (79), Ross Taylor (73*), Henry Nicholls (41) te chu a che ṭha zual an ni.

India tan target harsa han tih tur a ni lo a, chutihrualin vanduai theihna tur erawh a ni thung. Captain Virat Kohli-a'n mawhphurhna hlen zo loin run 25 chauh a siam a, Shreyas Iyer rawn che ṭha lehin run 52 siam mah se New Zealand bowler te an langsar zawk.

Kiwis bowler Hamish Bennett (58/2), Tim Southee (41/2), Kyle Jamieson (42/2) leh Collin de Grandhomme (54/2) ten wicket hnih ṭheuh an la a, over 48.3-ah run 251 siamin India batsman te an thi vek. 

India hian nikum Cricket World Cup semifinal-ah New Zealand an hneh lo a, tun ṭuma vawi hnih an chak loh leh tak avangin ODI bikah chuan a zawnin vawi thum an hneh tawh lo.