Mizo sports medicine doctor hmasa ber Dr Lalzarmawia Khiangte a thi

Mizo zinga sports medicine doctor hmasa ber Dr. Lalzarmawia Khiangte (Mapuia) s/o Hmingdailova Khiangte Chaltlang Lily Veng chu Zirtawpni zing khan lungphu chawlin a thi.

Mizoram Football Association-a executive committee member leh Mizoram State Sports Council-a sports medicine doctor ni bawk, Dr. Mapuia hi August 6, Nilaini zan khan thawh hah thut avangin damdawi inah hruai a ni a, a ṭha chhuak zo ta lo a ni.

Dr. Mapuia hian RIIMS Imphal, aṭanga MBBS a zawh hnuah kum 2011 khan Post graduate diploma in sports medicine chu NIS, Patiala, Punjab aṭangin a zo leh a, Mizo zinga a hmasa ber a ni. Kum 2017 khan football khawvela thuneitu sang ber FIFA hnuaia FIFA diploma in Football Medicine chu a zo leh a, Mizo zingaa awm chhun a ni. 

India-in a vawi khat nan FIFA Under 17 World Cup 2017-a thlen khan FIFA medical team-ah a tel a, World Cup-a a hnathawh ṭhat avang hian FIFA aṭangin chawimawina a dawng bawk. Mizoram football mai ni lo, infiamna dangah pawh tha thawhhlawk tak niin Mizo infiammite taksa inenkawl leh kaihhruaina kawnga puitu pawimawh tak a ni a; Mizoram Boxing Association-ah executive committee member a ni bawk.