Zanin dar 8:00-ah CYMA Football Final RG Stadium-ah Tlangnuam Vs Venghnuai

LBS Suzuki 21st Inter Branch YMA Football tournament khelh ṭan a nih khan final-a Tlangnuam leh Venghnuai inkhel tura ring an awm miah lo ang. Mahse, a thleng miau si, hei tka hi football ropuina chu a ni. Zanin dar 8:00 hian RG Stadium, Mualpuiah final hi khelh a ni dawn a, CYMA Football-ah champion thar an awm dawn.

Tlangnuam hi 'Giant Killer' tia sawi an ni a, champion ngun ber Armed Veng bakah champion rinkai Bawngkawn leh Durtlang hnehtu an ni. Venghnuai hi 'Dark Horse' an ni thung a, final thleng tura an kalkawngah Bethlehem Vengthlang leh Salem Veng te an hneh avangin dah hniam theih an ni lo.

Tlangnuam a nuam

Football vanga hriat hlawh ngai lo, Tlangnuamin Mizoram World Cup tia sawi hial CYMA Football-ah final an thleng. An champion lo a nih pawhin Tlangnuam hi an hlawhtling tawh a, an hun tawn avanga nuam an tih thu hi hun rei tak an la sawi dawn.

Tlangnuam pa lar Stephen Auhmun chuan, "Football-a hming chher kher hi a ṭul chuang love a. JF Laldailova véng kan ni a. Dengrikhuma, Hualrozama, Sanglianthanga leh Crusaders band, Helen Zaithankungi te kan nei a, Cindy pawh kan véng alawm. U Roluaha lah kan véng a nih piah lamah mi zawng zawng (deuhthaw) ui rawn Mafaa Hauhnar véng kan nih hi. Thu leh hla lamah kan champion tho hi maw," tiin a Facebook status-ah football-a an thlen san ṭhin loh avanga an inhnem ṭhin dan a tarlang a, thiam takin an hun tawn danglam taka avanga lawm thu a ziak tel bawk.

Ni e, Tlangnuam hi football thiam veng a ni lo. Kuminah erawh football thiam veng hnehtu an ni a, chuvangin football an thiam tih a chiang. Football-in Tlangnuamah inpumkhatna a thlen a, vanram tlafualah an cheng mek.

Counter Attack

Tlangnuam coach Francis Lalpekhlua hi a inkhelh laiin goalkeeper ṭhin a ni a, coaching-ah sulhnu sawi tur a nei lo. Chutihrualin college level-ah PUC leh MZU tan a veng pha a, MPL club Zo United tan te pawh a khel tawh.

Francis-a chuan, "Kan team chuan min hmuh angin attack dan mumal pawh kan nei lo a, kan goal khung dan pawh vanneih goal a ni ṭhin. Pathianah kan innghat a, engmah chhuan tur kan nei lo. Tlangnuam vek tan theihtawp kan chhuah a, Pathianin kan hnathawh mal min sawm a ni," tiin Vanglaini a hrilh.

Bawngkawn an hneh ṭumin captain Jones Lalṭhakima a inlan thei lo a, final-ah Isak Vanlalruatfela dah niltu PC Lalchhanchhuaha a thlak dawn. Tlangnuam tlangval Jones hi Aizawl FC leh Odisha FC reserve tan tea khel tawh a ni.

Tlangnuam hi team ṭha tak an ni a, team ṭha bik erawh an ni pha lo. Hei vang hian counter attack-ah an innghat a; tlarhmaah goal kua khung tawhtu Vincent Lalduhawma, CVL Remtluanga (goal 7) leh Vincent Laltluangzela (goal li) te an awm. Midfielder Zothanpuia pawhin goal li a khung tawh a, team angin goal 30 zet an khung tawh avangin goal venghim tawp an ni lo tih chu a chiang. Chutihrualin keeper Lalbiakkima hi team chakna hnar a ni pha a, final-ah pawh a player pawimawh a ni ang.

Venghnuai an ṭha

Venghnuai hian final lut turin goal 17 an khung a, Tlangnuam aiin goal 10-in khung tlem mah se team ṭha zawk an ni. Tlangnuam belhchian an dawl ang thoin coach K. Lalthlamuana kaihruai Venghnuai hi an player-te chikin team ṭha an ni a, champion tur pawhin an ṭha tawk.

Goalkeeper Joel B. Lalramchhana hi Mizoram team-a tel pha a ni a, Mizo keeper ṭha pathum zingah a tel pha a, goal ven chuan ni loin a ke hmangin ball a sem thei bawk. Captain Laldanmawia hi MPL U18 best player a nih tawh bakah NE Olympic-a Mizoram champion ṭuma player pawimawh kha a ni.

Salem Veng an hneh ṭuma goal awmchhun khungtu Eric Remruatpuia Chhangte hi AIFF Elite Academy aṭanga inzir chhuak a ni a, Eric-a kawppui ZD Laltlansanga hi Mizo midfielder ball pet thiama sawi tel tur a ni pha a, I League club Rajasthan FC tana khel Vanlalzahawma pawh bench-ah an dah thei.

Winger C. Ngurnuntluanga hi a ṭul dan a zira tlarhnungah pawh chhawr theih a ni a, forward Malsawmzuala Tlangte-in MPL-ah pawh goal a khung fo tawh. BVT lakah Sawma Tlangte hian goal ṭha bik a khung thei a, Tlangnuam lakah a inringtawk khawp ang.

Coach K. Lalthlamuana chuan, "Midfield-a chungnung zawk nih a ṭul dawn a, kan theih pawh ka ring. Counter attack-a innghat an nih avangin engtik lai pawha kan inring reng a ṭul dawn," tiin Vanglaini a hrilh a, Venghnuaiah a vawi khat nan CYMA Football champion nomawi hawn ngei an tum thu a sawi bawk.

CYMA Football Final
Zanin (June 9, Zirtawpni)
Tlangnuam Vs Venghnuai
A hmun - RG Stadium, Mualpui

Host - Nunu-i
Thusawi - R. Lalrinmawia, Organising Chairman
Solo - Cindy Lalthanpuii

• Inkhel en man hi Rs 50 a ni a, entu an tam dawn avangin kal hma a finthlak ang.

• Tlangnuam hi home team an ni dawn a, jersey var an ha dawn. Tlangnuam ṭantute pavilion awmna lamah an ṭhu ang.

• Venghnuai hi away team an ni dawn a, jersey pawl an ha dawn. Venghnuai ṭantute Bucket Seat-ah an ṭhu ang.

• Zan dar 8:00-ah final ṭan hmain programme tawite a awm ang a, inkhelh zui nghal tur a ni.

• CYMA hruaitute aṭangin thusawi a awm ang.

• Halftime-ah Keimah Senes, Tlangval Tlumtea leh Lil Me te an zai dawn.