Football-in Tlangnuam a phuar khawm

Tlangnuam hian final thleng turin vanneihna an mamawh a ni thei a, hemi phenah hian thawhrimna leh inbuatsaihna ṭha a awm tih erawh hriat ṭha. Football a nun thar leh theih nan managing board din a ni a, lang lo lamah an thawkrim hle.

Football hma hian futsal-ah ṭan an la a, kum khat chuang mumal taka an kalpui hnuah Division One aṭangin Futsal League-ah an inpetkai a, Division One-a an champion hian vengchhungah phurna nasa tak a pe bawk.

Tlangnuam hi Branch YMA pathum Tlangnuam, Tlangnuam West leh Tlangnuam Vengtharah te an inṭhendarh tawh. CYMA Football-a Tlangnuam an chet ṭhat chiah hian Tlangnuam West leh Tlangnuam Vengthar te hian an ṭawiawm ṭha a, entu lamah Branch YMA pathum chu pum khat an ni a, hei hi ṭantu an neih ṭhatna chhan pawh a ni.

Semifinal-ah RG Stadium mawi tham Tlangnuam mipui an pung khawm thei a, final-ah an tam lehzual dawn. Bawngkawn an hneh zawh khan an veng mual zawlah veng mipuiin player-te zahna chibai a buk a, an hun tawn ropui zia hi thua sawifiah chi a ni lo.