Salem Vengin min ṭawiawm dawn - Venghnuai coach

Venghnuaiin final lut turin anmahni aṭanga indang Salem Veng an hneh hram a, inkhelh banah boruak pawh a muanawm hle. Venghnuai coach K. Lalthlamuana chuan, "Salem Veng an puitling a, an hruaitute pawh an entawntlak hle. Hnehna kan chan min lawmpui thiam a, inkhelh banah pawh kan bulah rawn kalin Rs 1,000 min pek bakah final-a min ṭawiawm tur thu a rawn sawi," tiin Vanglaini a hrilh.

Salem Veng hian Venghnuai hi an ṭawiawm ṭhat ngei pawh a rinawm a, veng pahnih hi an inlungrual a nih ngat chuan khelmual pawn lamah pawh an chungnung zawk thei hial ang.

Venghnuai hian nimin hnatlangin final-a an player-te auh phurna tur hmanrua te an siam a, CYMA Football nomawi hawn ngei an tumruh hle. Tun hmain Venghnuai hi inkhelh thiam veng tia sawi an ni a, tun hnuah MPL club an neih avangin football-ah ṭhang hle.

CYMA Football final la thleng ngai lo mah se Venghnuai hian club football-ah tawnhriat an nei ṭha thung. MPL U18 hnuhnung pahnihah an champion a, Mizoram chhunga football inelna sang ber Mizoram Premier League hnuhnung berah final an lut bawk. Venghnuai player chauh ni loin mipuite pawhin RG Stadium an hre bel a, boruak pawh an siam thiam khawp ang.