‘The Chosen One’ kutah nomawi an hlan ta

Manchester United-a Sir Alex Ferguson-a'n a hmun ruak luah tura a thlan, fan-ten duh taka 'The Chosen One' hming lem an pek, beisei ang result a neihpui loh avanga a hnua an hawi san David Moyes chuan a professional career-a a vawi khat nan major trophy a chawi ve ta.

Nilaini zan khan Europa Conference League final khelh a ni a, Moyes-a enkawl West Ham chuan 2-1 a Fiorentina hnehin champion nomawi an chawi - Hammers tan kum 43 hnua champion nomawi an chawi hmasak ber a ni a, nomawi hlutna hi a zual bik ang tih ringhlel suh.

Hammers tan Said Benrahma chuan penalty hmangin goal hmahruai a khung a, Italian club-in Giacomo Bonaventura hmangin chhanglet zui mah se minute 90-naah Jarrod Bowen chuan chakna goal a khung.

A tawpah Hammers-in hnehna hlado an chham a, season tharah Europa League an khel dawn - David Moyes-a'n nomawi sawi tur a nei ve ta a, Scottish coach ṭhatna hrechiangtuten a phu an ti ngawih ngawih ang. Ni e, David, champion i phu e.

Inkhel hmuhnawm

Fortuna Arena, Prague khawpuiah champion châk team pahnih an intawng a, beisei angin goal erawh kan hmu lawk lo - inkhel ṭantir lamah Michail Antonio leh Declan Rice ten chance nei mah se an hun neih an chhawr lo a, Fiorentina an vanduai bawk.

First half hun pek belhah Italian club hian hun ṭha an nei. Mahse, Christian Kouame ball tauhin bar a per hnua a let lehlam chu Luka Jovic chuan a khungah inngai mah se offside vangin pawmsak a ni lo a, video assistant referee hmangin thutlukna hi a dik tih nemngheh a ni.

Minute 60-naah Hammers tan thil ṭha a thleng zui - Bowen nen ball an inchuhna lamah Fiorentina captain Cristiano Biraghi chu a handball a, referee-in VAR a rawn hnuah penalty a pe - Benrahma chuan hei hi goal-ah a chantir a, 1-0 a ni.

West Ham tan goal khat hi chakpui mai theih tura ngaih a ni a, mahse, beisei ang ngawtin thil erawh a kal bik lo. Minute nga a liam chauh a, Bonaventura chuan Fiorentina tan mawi zetin si phurh a sut - a chiang lo leh zo!

A hun têah...

Hammers-in thawnthu hriatreng tur hnutchhiah an duh a, kut ruaka London lama haw an zuam lo. Minute 90-na a ni a, West Ham-in 'magic' min hmuhtir - Lucas Paqueta chuan mawi lutukin Fiorentina defender karah Bowen tan ball a pe a, English forward hian ṭha zeta ball um lutin goal-ah a chantir.

West Ham boss David Moyes meuh pawh a insum zo lo - a player goal khung lawm hian a tlan chiam a, LMA Manager of the Year vawi thum ni thei coach lawmna hi khawvelin an dem lo ang - nomawi chawi tur hian a nghak rei ve tawk!

Moyes hian inkhelh zawhah a pa, kum 80 mi David snr awmna lam a pan a, an pafain an chak an lawm - kum 60 mi Moyes hian nomawi chawi turin kum 25 zet a nghak a, a pa nena a medal an lawmte chuan a tana ECL nomawi hlutzia a hrilhfiah.

United boss hlui Moyes chuan, "Medal awrhtir tura ka rilrua lo awm hmasa ber chu ka pa a ni a, a hlim ve ngei ang tih ka ring," a ti a, a hlim lai ber pawhin amah thlawp tlat ṭhintu a pa a hre reng.

June 7, Nilaini Zan - ECL Final

Fiorentina 1 - 2 West Ham United

FIO: Giacomo Bonaventura 67'

WHU: Said Benrahma 62' (P); Jarrod Bowen 90'