Saudi aiah US - Messi pan tur a chiang ta!
Football legend Lionel Messi chuan sum tam tak hlawh tura Saudi Arabia club Al-Hilal sawmna chu hnawlin, USA lam pan a thlang a, David Beckham-a club Inter Miami a zawm dawn - he thuziak i chhiar meuh chuan jersey a pawt parh tawh hial mai thei.
Kum 35 mi Messi chuan, "Miami-a kal turin thutlukna ka siam tawh a, Europe ka chhuahsan dawn," a ti a, Al-Hilal ṭantute an hnual a, Barcelona fan-ten an club jersey ha leh tawh ngai lo turin Argentine player ṭha bik hi an thlah.
Messi chuan sawi zawmin, "European team dang aṭang pawha sawmna hmu anga min sawi hi a dik a, mahse, Barcelona a nih loh chuan European club dang tana khelh hi ka duh tawh lo.
"World Cup nomawi hial chawi a, Barcelona-a ka kir theih tak bawk si lohah chuan, MLS lama hahdam zawka inkhelh a, ka ni tin nun zalen taka hman ve a hun tain ka hria a ni. Tun hma ang thoin hnehna chan duh erawhin ka la inkhel reng dawn a, thinlung erawh a hahdam deuh tawh ang," a ti.
A rem lul lo
Messi hian Paris St-Germain-ah a ṭul dan a zira kum khat dang contract pawhsei theihna dan a nei a, mahse, contract thar ziak loa chhuah a thlang - Messi hian a hmangaih hmasa Barcelona lama kir a duh a, mahse, sum lama talbuai Barca tan Argentine forward hi lak let theih a ni lo.
Kum 35 mi Messi chuan, "Hrehawm ti taka ka chhuahsan ang khan Barca hi chhuahsan leh a ṭul ang tih ka hlauthawng a ni. Barcelona-a kir hi ka châk em em a, mahse, ka tawnhriatte ka thlirkir hian, khatiang ang dinhmun hrehawma din nawn kha ka duh lo a ni.
"Enge thleng dawn, tih nghah reng kha ka peih tawh lo. Min lalut turin player hralh emaw hlawh tihhniam emaw an ngai tih ka hria a, a nihna takah chuan chutiang thlentir a, mawhphurtu nih chu ka duh lo," a ti a, Catalan club a kir loh chhan a sawi.
Barcelona pawhin thuchhuah siamin, "League hautak lo zawk leh, kum tam a lo tawn tawh pressure sang tak hnuaia awm reng lo a, hahdam taka inkhelh a thlang hi club president Joan Laporta chuan a hrethiam hle a ni," an ti!
Hello US
Al-Hilal chuan Messi hi kum khata euro maktaduai 500 hlawhtir a, kum thum contract ziahpui an tum niin khawthlang media-te chuan an tarlang a, Miami lam a awn deuh nia an hriat khan Barcelona khawpuia Messi pa lam tur leh Paris-a Messi chhungkua lam turin private jet an tir nghal niin an sawi!
Mahse, Messi hian Major League Soccer club hi nun dan phung leh football piahlama a hlawkna turte thlirin, a thlang ta zawk niin an sawi. Messi hian season khatah dollar maktaduai 100 vel a hlawh dawn nia sawi a ni a, hei bakah hian Apple leh Adidas chuan MLS nen an thawhhonaa an hlawkna aṭangin Messi hi share pek an rem ti bawk.
Messi hian US a pan hian hlawh leh thil dang neuh neuh chhut chuan dollar maktaduai 150 vel tal chu a lalut tura ngaih a ni a, mahse, Saudi Arabia nena khaikhin a ralah chuan a sum lakluh tur hi a la inthlau hle.
PSG tan match 75-a goal 32 leh assist 35 neitu Messi hian France-ah league nomawi vawi hnih zet a chawi a, mahse, an duh ber Champions League nomawi erawh a chawipui thei bik lo - season hman zawh takah khan match 41-a goal 21 khungin, assist vawi 20 a nei.
Sum aiah hahdamna
Messi hian kum 2021 khan sum lama an talbuai avangin Barca a chhuahsan a, goal 672 zet khungsakin, La Liga nomawi 10 a chawipui bakah, Champions League-ah vawi li a champion pui a, Spanish Cup-ah vawi sarih nomawi a chawi bawk.
Argentina international Messi chuan a ṭhian ṭha leh Barcelona manager Xavi nen an inbiak reng thu sawiin, amah laklet tuma bei nasa tak anga insawi club president Joan Laporta nen erawh vawi hnih aia tam an inbiak loh thu a sawi thung!
Messi chuan, "Kan phur êm êm a, club-a kir tura min duh tak tak leh tak tak loh chungchangte, club leh ama tana ṭha a nih leh nih loh thlengin kan sawi. Mahse, contract chungchang kan sawi lo hrim hrim, sawmna ang chu a awm ngei a, official taka dawrna erawh engmah a awm lo.
"Tumna chu a awm a, mahse, thil tak tak kha a awm lo - sum chungchang pawh kan sawi lo. Sum vang ni ta se, Saudi emaw hmun dang ka pan ang," a ti - Messi hian Miami-ah hian in a nei sa a, nuam a tihna sa a pan niin a lang.